【癲傻255KM體驗之旅-最終日美孚到青衣42KM】

終於去到最後一日，屋企食個早餐就舒舒服服出發！天公作美，是日天朗氣清，跑到跑得順啲。沿荔枝角公園上西鐵站去荔景，小編住左美孚咁耐，真係瞌埋眼都識跑。去到大連排道，好彩揀咗假日跑，成條街好靜，同平時車水馬龍熱鬧場面大不同。呢度建議跑友們可以試吓星期日早上早啲起身跑吓街，感受下城市嘅寧靜。

之後就一條大斜路沿和宜合道上城門水塘，好多荃灣區嘅跑友應該好鍾意操呢條斜路，慢慢‘印’構想引水道，係一條接近10公里嘅平路，小編立刻提速快快手追返啲時間。去到荃錦公路就要小心過馬路，再沿石屎度一路跑到油柑頭村，其實呢段路由都真係幾好跑，小小上落，林蔭處處，景觀開揚。

去到麗城花園就見到家鄉，現時荃灣西站一路跑，經海濱花園永順街葵裕街上青衣南橋，再次踏足青衣真係有啲感動！畢竟已經跑咗二百幾公里，真係唔簡單！但係施sir梗係要大家環青衣一週先返去啦，過橋之後向藍澄灣方向跑，落貨櫃碼頭再向昂船洲大橋橋底方向進發，去到橋底記得再影返張相打個靚卡，之後就沿青尚路到青衣路，呢度有個油站，大家記得略作補給先繼續，之後要去到終點先至有嘢飲架啦！

(花開處處，真係好靚!)

(另一端的昂船洲大橋)

(青衣特產: 巨大護土牆)

唔知青衣路跑埋最後一條上斜路，跑嘅時候心裏面百感交集，一方面望住開陽嘅青馬大橋景，回想返以前跑過嘅路，雖然肉體疲乏，不過心靈反而無比清晰，原來自己好耐冇試過咁純粹咁集中地完成一個挑戰，全程放低電話嘅 #MeTime 真係好難得！

(最後一條上斜路，百感交集!)

慢慢走，好快就返到青衣海濱，之後無比興奮咁衝返青衣運動場，再自走一圈無歡呼聲嘅victory lap，完結呢個癲傻255KM嘅旅程！

(回到家鄕)

後記：其實呢條路線好好玩，路經好多有趣地方同打卡靚境，作為土生土長香港人，好多地方真係完全冇聽過，自從上年開始施Sir引入虛擬跑模式，大家更加可以隨時隨地隨心分段跑，靈活之餘不失為一個絕佳嘅年度儲個人最長里數大project！成日都話一年之計在於春，不如大家又試吓用跑步去洗滌心靈，一路跑，一路訂個目標比自己？