【癲傻255KM體驗之旅-第五日將軍澳到美孚47KM】



終於去到尾聲,第五日天氣好返啲,仲幸運撞到 #癩傻跑 創辦人 #施Sir!究竟由郊區跑返入市區,景色同感覺有咩分別,一齊睇落去啦!


第五日雖然天陰陰,不過冇乜雨落都算乾爽,反正今日全程響城市入邊,索性雨褸都唔帶輕裝上陣,目標係跑返屋企!(小編家住美孚)


(其實,賞花唔一定要去日本,香港好多地方啲花都好靚)


調景嶺地鐵站出發,沿寶康路上寶琳路,之前幾日跑來跑去都係綠油油,今日一起步就係高樓大廈有啲唔慣。不過去到寶琳路就轉返做山景,沿路斜度都幾大,慢慢 #跑嘅動作行嘅速度 ‘印’上去,天氣涼浸浸咁其實都幾舒服!中途仲經過安達臣道石礦場發展區,呢度將會係另一個大型嘅發展項目,有啲跑友經過見到中間有個隧道口,會好奇究竟條隧道通去邊,其實呢條只係一條130米長連接寶琳路同發展區嘅短程行車隧道。



(天陰陰,雨濛濛,另一番景象)

沿寶琳路走到尾就會左轉秀茂坪道,呢度開始就同綠悠悠嘅山景講拜拜啦,因為會進入城市,要去到尾段城門水塘先至再入山。經過寶達商場快快入去補水同食啲嘢,跟住就開開心心落斜經油塘地鐵站出鯉魚門,鯉魚門大家可能去得多,不過應該好少出到碼頭嗰邊,鍾意海嘅施sir 當然會帶大家去到碼頭尾嘅公園,嗰度係避風塘嘅盡頭,回望鯉魚門一帶嘅酒家同棚屋,感覺都幾特別。



(冇乜幾何出碼頭公園,幾得意)

之後就會向水泥廠一帶進發,感覺有啲似鐵甲威龍電影入面嘅底特律市咁,又荒涼又沙塵滾滾,隔離係回收廠同魚類批發市場,成個感覺好似世界未日剩餘人類響廢墟生活咁。沿着地盤一路跑,好快就去到茶果嶺一帶,呢度係市區碩果僅存嘅其中一個寮屋區,聽講好快會改建公共房屋,有興趣探索香港舊有面貌嘅朋友記得快啲過嚟跑下啦。

(世界未日的感覺)


經過麗港城花園,沿觀塘海濱長廊跑,大家要留意呢段路,因為進行緊中九龍幹線嘅工程,附近經常改道,總之就一路跑到尾搵天橋過馬路去九展,之後就進入啟德新區,連承啓道跑,大家會見到於2023連落成嘅啟德體育園。呢個香港最大嘅體育項目,將會有一個可以容納五萬人嘅主場館,另外有一個全香港最大嘅室內運動場,入面可以同時開12個籃球場(嘩!),而且可以靈活變成容納一萬人嘅室內比賽場館,唔知會唔會有香港首個國際級別嘅劍擊比賽喺度舉辦呢?


開始進入土瓜灣舊區,呢度撞到另外兩位跑癲傻嘅師兄,原來跑界入面又癲又傻嘅人比比皆是,大家寒喧幾句之後就決定一齊跑一段。一直沿着黃埔海旁跑,維港景緻盡收眼底,我諗呢個係所有香港人百看不厭嘅景色,有靚景有跑友傾吓講吓不知不覺就去到西九海濱長廊,呢度小編就決定去幫襯美食車補給,同兩位朋友分道揚鑣。又濕又凍嘅天氣基本上冇乜人出海旁,所以小編就好寧靜咁食咗個非常好食嘅肉眼扒配白飯,再沿海旁跑返入渡船街佐敦一帶。

(有人一齊跑係開心啲,特別推介埋圖中熱嘅罐裝栗米湯,冬天跑補給一流!)


之後去到奧運站附近大家要特別留意,因為好容易搵唔到路出返大角咀海濱長廊,不過唔使擔心,真係蕩失路嘅就索性直入商場穿過地鐵站就可以出到去,正所謂 #跑癲傻蕩失路是常識吧,跑錯少少冇緊要嘅。沿着海濱就可以一路跑去海樂苑海盈邨,呢度竟然比我撞到癲傻跑嘅吉祥物 - 施sir本尊!梗係要立刻同打個咭,傾吓計,原來佢同朋友都跑緊其中一段,當然佢嘅速度同我等凡夫俗子完全冇得比,得到施Sir嘅加持鼓勵,佢快快手起步之後,我再諗飲啲嘢補充體力先至會慢慢上路。

(追返之前嘅師兄們,一齊同施Sir打咭)


經興華西街沿着昂船洲大橋橋底一路跑到尾,你就會見到貨櫃碼頭一帶嘅海景,來到呢度記得影張相,因為呢度嘅風景好特別㗎!遙望橋嘅另一邊,終點在望,你會覺得好感動,不過唔好以為就嚟完結,嚟到呢個位置大約200K左右,仲有50幾K等住大家!




影完相就記得過對面馬路一直跑,之後進入貨櫃碼頭返嚟搵啱路口就轉彎上橋返美孚,建議大家睇呢條路線一定要揀星期日,平日呢度車來車往,仲要係大車,真係沙塵滾滾得緊要。住左美孚十幾年都未試過呢個方向用呢條路線返屋企,感覺好特別。所以癲傻跑會帶大家去到好多香港未去過嘅地方,真係值得試吓!

(咁樣返美孚真係第一次)


跑完第五日,感覺唔算特別疲累,可能真係唔跑唔知身體好,返屋企沖個涼就拉筋休息,準備最後一天嘅完結日!


0 comments