【癲傻255KM體驗之旅-第四日馬鞍山到將軍澳30k】

來到第四日，已經跑左百四K不過都仲有百幾K，究竟小編會唔會頂唔順，天氣又會唔會變壞？快啲睇落去就知啦。

隔日休息完，果然身體慢慢適應長距離跑，起步感覺冇之前咁攰，曾經睇過一篇文章，人係眾多動物中最適合長跑之一，睇嚟有啲道理！今日因為上晝要返office趕工，所以只可以食完lunch先起步，唯有target跑到將軍澳執30K算數。

馬鞍山站一出，當堂倒抽一口涼氣，天陰陰雨綿綿，又濕又凍真係想返屋企瞓覺，不過一場來到，死就死啦！嗱嗱臨搵個膠袋包好啲替換衣物銀包電話就起步，跑開山操開超長課嘅跑友應該好熟悉呢啲落雨流程。

(天陰陰，雨濛濛)

由馬鞍山公園出海旁就起勢跑，可能因為太凍，跑過左個路口一直去到馬鞍山沙灘先知走錯路要返轉頭，跑癲傻就係咁，走錯路蕩失路係必然，快快手走返啱咪得囉，走多幾K你唔會介意嘅，又或者咁講，你既然癲到傻到跑255K，唔係斤斤計較區區幾K嘛？

走返啱就去到烏溪沙站，如果大家係全走，或者分段不過之前已經走咗一段距離要補給，最好响呢度食飽飲飽先，因為成條西沙路要到水浪窩先有汽水機，如果係操山季節，部機可能冇貨架！當然小編啱啱起步就梗係繼續跑，由於呢度做緊工程，所以條路大塵得來又經常改路，不過向着西貢方向走就冇問題，跑跑下抬起頭望向馬鞍山，雲層同霧氣濛濛，別有一返感覺。

(落雨濕濕，快快手跑完西沙路)

好快去到水浪窩，因為天氣凍所以冇買水直出西貢，沿途風景冇乜特別都係路呀樹呀海呀車呀咁囉，去到西貢真係凍得滯頂唔順，唯有坐低食碗雲吞麵先繼續跑，好彩食完之後停雨叫做暖返啲手指有返感覺。西貢公路一路去到白沙灣望住個海陰陰沉沉咁，望下個錶，仲有十幾K，深呼吸幾下，再跑！

到蠔涌，又係另一條奪命長命斜！咬緊牙關跑嘅動作行嘅速度慢慢Un到上頂個天已經開始黑。經隧道過科大迴旋處出返來已經接近黑齊。跑左四日終於第一次天光跑到天黑！呢度建議大家跑癲傻最好長備一支單車紅色尾燈響個跑袋入面，淸水灣道呢啲偏暗嘅街道成條路線比比皆事，就算有行人路都好，有支尾燈點都安全啲。去到清水灣道尾有條大落斜，去到迴旋處過馬路要特別小心，尤其放工時間多車就真係睇清楚先過。

(跑到天黑，跑友們跑郊外石屎路段記得帶定尾燈)

落到將軍澳唔好開心住，鍾意海邊嘅施sir 梗係會去埋將軍澳海濱長廊，仲要首先兜上環保大道，跑入康城再經康城路，全條海濱大道跑晒先夠癲夠傻嘛！不過話說回來，海濱長廊係好跑嘅，今次仲要夜晚落雨凍凍地冇乜人，感覺良好！

(環保大道，日出康城，將軍澳海濱長廊)

跑到調景嶺站就收腳換衫走人，預備聽日返工。忽發其想，如果可以唔使揾食日日咁樣跑步，其實都幾浪漫（最浪漫嗰part應該係唔使揾食.....）

未完待續........（究竟幾時先可以跑完？）