【癲傻255KM體驗之旅 - Day 3 粉嶺到馬鞍山（約61K）】

旅程去到第三日，由 #粉嶺 去到 #馬鞍山，沿途風景同補給如何？大家繼續睇埋落去啦！

Day 3 粉嶺到馬鞍山（約61K）

第三日由粉嶺出發，雖然今次已經係隔日跑，每次跑完都有一整日休息，不過係到第三日起步都真係好似好攰咁，根據以前嘅經驗（筆者曾經試過用六日時間 #橫越日本320公里，每日大約跑50至60公里，詳情可瀏覽 橫渡日本 上集 / 下集），乳酸積聚係必然，不過通常捱過頭嗰5公里就會慢慢順返。

粉嶺起步好快就到 #沙頭角公路，呢部份基本上沿着沙頭角公路一路走到 #邊境閘口，路程會經過啱啱起好嘅 #龍山隧道 同埋 #香園圍公路，由於仲係封關中，車唔算太多，過咗 #萊洞 之後由於人煙比較稀少，比較有田園鄉間嘅感覺，再到鹿頸公路，大家如果想全走成條路線嘅話就記得唔好轉彎直入沙頭角邊境閘口，正如之前講過，條路既然又癲又傻，係要跑幾K入去跑返幾K出嚟儲夠里數！不過其實閘口影相都幾得意嘅，當然你目標淨係打算儲夠200拎公仔嘅（今年玩法係儲夠200就有LEGO公仔），咁喺路口就可以轉入 #鹿頸 直上 #新娘潭。

(粉嶺起步，經聯和墟去沙頭角公路，沿途花開燦爛，清風送爽，正!)

(見風景咁靚學人落下filter，又真係唔同感覺)

鹿頸至新娘潭呢段其實都有小小危險，灣多路窄之餘有啲位置冇正式行人路，不過側邊都有啲草皮俾大家跑，唔需要跑馬路㗎！如果你想好似施Sir咁樣一次過跑晒255km，而又選擇晨早七八點左右出發，跑到來呢度應該係大約深夜左右，咁就一定要帶定頭燈同埋尾燈（紅色單車夾燈），夜半新娘潭啲車有幾快，有睇過烈火戰車就知！

(邊境幾特別，冇去過(而又有氣有力)可以跑去望下)

(鹿頸新娘潭路風光明媚，平日又靜，沿路慢慢跑，感覺好似返去當時橫渡日本之旅咁)

離開新娘潭，好快就去到 #大美督，嚟到呢度最好食返啲固體嘢食補充返少少，反正大把餐廳，食乜都有。不過沿路出返大埔都有好多餐廳士多補水補糧食，要趕路嘅就可以快快腳密密食慳返啲時間。

(遠眺八仙嶺同慈山寺，靚!)

去到 #大埔工業村，千祈唔好合埋隻眼就衝出去大埔，鍾意海邊嘅施sir又點會俾你咁容易入去呢？記得去到大貴街就轉左直出 #大埔海濱長廊，不過又咁講，條路又真係靚啲舒服啲嘅，咁如果你錯過咗個路口點算呢？咁咪下個路口轉返囉，其實大致跟返條路線，差少少施sir冇所謂嘅，唔通返轉頭跑過咩？

去到回歸塔附近，記得千祈唔好過橋直出吐露港，因為路線沿林村河其實要直入 #太和，去到 #梅樹坑遊樂場 先至過對面再沿河出返 #吐露港公路，係架，施sir除咗海邊之外都好鍾意河㗎，轉頭去到城門河你就知！

(入太和梅樹坑呢段其實幾好跑，林村河好多魚同雀，生機勃勃)

出返吐露港公路如果未崩潰嘅，咁就繼續跑呀跑跑跑跑跑跑到科學園中大再到 #沙田孖橋，究竟應該直去馬鞍山定轉右入大圍呢？成身散晒嘅你梗係想直接出馬鞍山，不過鍾意河嘅施sir當然會跑到盡入到大圍穿過火車站再沿河出返孖橋。小編嚟到呢一個位，望住橋嘅對面，諗到自己過零鐘前跑過，嗰種感覺好似食完一啖辣椒再食多啖雪糕咁，唔識形容，算啦，都係繼續跑啦⋯⋯

(入吐露港已經一隻馬，不過仲有20K，慢慢長路遇好友)

(收工，61K埋單)

再跑多幾公里去到馬鞍山運動場附近 #天慢慢黒 #人漸漸虧，望一望錶，61公里，叫做補償返前兩日爭落嘅里數，就嗱嗱聲去運動場沖涼返屋企休息。

未完待續.......等陣，三日夾埋跑左成百四K，點解仲有成百幾K未完待續架？