【癲傻255KM體驗之旅 - Day 2 粉嶺到天水圍(約38K)】
第一日熱完身，第二日里數可唔可以突破42K呢？隔日跑一個接近全馬距離會唔會受傷？快啲睇吓第二日嘅路線分享！
Day 2 粉嶺到天水圍（約38K）
咦，等陣先！琴日唔係已經去咗 #天水圍 嘅咩？今日路線唔係天水圍去 #粉嶺，點解調返轉㗎？事緣今日約咗亞女去濕地公園family day，費事去到粉嶺又要特登搭返車返天水圍，咁所以決定今日掉轉跑。冇錯，今年施sir容許 #靈活玩法，鍾意點走就點走，就算走錯路，只要唔係嚴重偏離原本路線都冇問題。事實上過往玩開 #癩傻 嘅經驗就係，有時 #施Sir 步速太快跟唔到，跑友們會選擇搵捷徑直接去下一點等候施sir，繼續旅程。
由粉嶺火車站出發，出馬會道一直走好快就會去到寶石湖路，跑多一陣轉彩園路就會去到有名嘅 #塱原濕地 同 #梧桐河 一帶，呢片係全香港最大塊，最完整嘅淡水濕地，好有生態價值，假日跑過仲會見到好多攝影發燒友觀鳥同影相。梧桐河更加係魚類物種豐富，小編當日跑過就見到成隻腳咁長嘅塘蝨喺淺水區域遊過，不過河水污染極嚴重，早前更加有電視節目嘗試將河內釣上嚟嘅魚煮熟食用，個個食一啖就立刻吐返出嚟！
(沿粉嶺走，花開處處，靚)
沿着河過橋再跑一陣就去到好有名嘅 #羅太士多，疫情前呢度嘅豆腐花係任食架！好多人行山或者踩單車都特登嚟呢度食嘢補給，不過而家就衛生問題只限一人一碗，如果順走癲傻路線呢度就係一個好重要嘅補給點，皆因上一個補給點已經係 #皇崗口岸，沿途除咗一兩間士多之外都冇乜特別地方買水補嘢食。
(沿有名嘅大水管一直走，好快就到羅太士多，懷念疫情前任食嘅時光!)
食完就繼續沿馬路入 #得月樓警崗，呢個響正邊境隔離嘅警崗一向都係打卡熱點，影完相就一路沿着邊境跑，呢條路段相當舒服，兩邊農田包圍，再眺望深圳嘅高樓大廈，成件事有啲超現實嘅感覺，不知不覺就跑到去落馬洲路，再跑多陣就回到現實接返車水馬龍嘅 #新田公路。呢條路又嘈又大麈，即使係跑開街嘅小編都有啲頂唔順，快快步跑完接返 #單車屯馬線 入 #錦綉花園，入返內街成件事就當堂舒服晒，呢段單車徑啱啱起好，跑起上嚟相當爽，不過大家跑友記得唔好跑落單車徑，呢度即時係平日都頗多單車來往，好危險㗎！
(得月樓警崗，附近路段好好跑)
經過錦綉花園再跑多陣就會去到 #大生圍 同 #南生圍 一帶，呢度就有一個非常靚嘅濕地景，可以眺望香港好珍貴嘅濕地資源！原來好多珍罕嘅候鳥都選擇響香港停留都係因為呢一片濕地，香港真係要好好珍惜咁寶貴嘅自然資源。
(單事屯馬線其實好好跑，想睇返我地跑遊全線分享，可按此)
好快又跑返出新潭路，跑大約500米左右就會見到新田公路，嚟到呢一個路口位大家記得轉入 #錦上路 同 #錦田 一帶，因為路線要求大家沿錦田公路入錦田市中心補給，跟住再兜個圈仔出返去先就繼續旅程！好多人跟施Sir跑都會選擇嚟到呢度就完結自己嘅旅程，因為啱啱50公里左右，又近西鐵站方便離開。咁小編抱住朝聖嘅心態，當然要跑晒成條路線啦！唔好睇小呢個小圈，都成五六公里㗎！
(跑到一半竟然有雪糕車同小食賣，可遇不可求!)
離開錦田之後就會駁返青山公路元朗段，大家記得經隧道過馬路去博愛醫院嗰邊，去到博愛醫院好快就會入返 #元朗市中心，不過大家記得唔好沿着輕鐵跑， 要接朗業街去朗屏西鐵站。玩得癲傻嘅朋友都應該知道，#迷路係必然，唔想走冤枉路嘅可能就要之前做定啲功課，而最緊要就係啲主要幹道就要選啱地方過馬路，錯過咗個路口分分鐘要跑多一兩公里做修正！
(見返文明)
去到朗屏其實已經見到天水圍，不過仁慈嘅施Sir又點會比大家咁容易過關呢？大家記得要兜入 #元朗工業村，講真，小編覺得呢段路幾新奇，佢唔似大埔工業村咁有工業色彩，呢度嘅廠房矮啲又闊啲，但係又有好多大家耳熟能詳嘅香港品牌，加上工業村之後嘅路段又會遙望到南生圍嘅景色，感覺好特別㗎，如果唔係跑癲傻都唔會嚟到呢啲地方。
(南生圍對岸，風景咁靚快啲叫癲傻仔出來影下相)
兜一個圈又貢獻多5公里，之後再經朗屏村入天水圍，再搵間體育館沖埋涼就下半場濕地公園family day，簡簡單單又一日！不過今日里數唔太夠就埋下左伏線......
未完待續........