【城市綠洲跑 - 啟德區歷史跑遊】


之前一路都介紹好多郊外嘅跑步行山路線比大家,今日我地就探索下市區嘅路線啦!今次我地會係 #啟德 附近跑,唔知大家又知唔知呢度其實有好多具文化價值嘅建築呢?事不宜遲,等我哋帶你一路跑步,一路了解香港歷史啦!

路線約13公里會由何文田地鐵站開始,彩虹地鐵站完,會途徑共11個文化地點:

聖母堂——> 紅燈山——> 香港中華煤氣公司——> 牛棚藝術村——> 東方紗廠有限公司——> 宋王臺——> 聖三一座堂——> 九龍寨城公園——> 石屋家園——> 嗇色園黃大仙祠——> 牛池灣鄉

首先我地會經過聖母堂。五十年代,大量難民由內地湧黎香港,白英奇主教亦同時間黎到香港。佢知道紅磡大環山有好多難民聚居,所以1959年係戴亞街上建設依座聖堂。時至今日,聖母堂已經係紅磡屹立六十年啦。

跑多一段路,沿 #佛光街 跑上 #常樂街,抬頭我地就會見到紅燈山。依個名其實源於一支訊號燈,當年 #啟德機場 仲運作嘅時候,依支訊號燈就係為左防止飛機撞山而設立嘅。雖然依家已經唔會再見到依支訊號燈,但係相信係附近長大嘅人一定唔陌生。



沿常盛街到 #天光道 #馬坑涌道 #新山道,我地可以見到香港僅存嘅煤氣鼓,佢係五十年代建成,跑過個陣不妨順便回憶下以前土瓜灣嘅工業風。




(舊區人情味處處, BTW 圖文不符)


出返 #馬頭角道#牛棚藝術村 係本港僅存嘅戰前牛隻屠房,本來叫做馬頭角牲畜檢疫站。佢建於1908年,曬牛皮、製牛骨粉、用牛皮同牛骨提煉明膠、生產藥物膠囊等等都係牛棚進行,直到1999年上水屠房啟用,牛棚先正式關閉。依家個度有多個藝術工作者同藝術團體,每日都免費開放比市民參觀同打卡。




(學人懶勁咁加下filter先)

打完卡就唔好錯過響木廠街嘅九龍大三巴-東方紗廠。呢間紗廠響50年代好出名,由兩大家族萬春氏、傅老榕創立。1981年結業之後,2010年被列為三級歷史建築,可惜冇耐就被業主拆剩一幅外牆連窗框。大家不妨去睇下依個外牆奇觀。想知多啲,可以去按我




之後我哋跑去 #宋王臺道 了解下宋朝的香港。宋皇臺公園記載左南宋末年最後兩個小皇帝——宋帝昰同宋帝昺逃難來港嘅事跡。為左避開元軍嘅追殺,佢地黎到九龍,依次亦係唯一一次香港有在位嘅帝王到來。而當時嘅九龍城係一個好有規模、交通頻繁、有官兵駐守嘅官富鹽場。不過,避難半年之後,元軍趕到,小皇帝最終先後殉國。而後人為紀念宋帝來港嘅事跡,就係山上大石刻上「宋王臺」。



響宋王臺對面有一座紅磚牆配綠瓦頂,外貌似中式廟宇,但屋頂又有象徵基督教嘅十字架嘅建築。佢就係1890年創立嘅 #聖三一座堂,佢係九龍區首間以中國傳統建築形式興建的教堂。作為中式文藝復興建築,佢嘅設計中西結合,別具風格。

沿 #馬頭涌道 #龍崗道,我地黎到九龍城。相信冇人唔識 #九龍寨城公園,係二戰時期,依度曾經有達約一百年嘅時間「三不管」地帶,即係中國政府、英國政府、香港政府都唔管,當時有大量低下階層住係度,亦係黑社會聚集嘅地方。時至今日,公園仲保留左原為寨城官府衙門嘅建築,同埋兩尊清朝古炮,亦成為一個舒適寧靜嘅地方。



來到呢度已經大約7公里,不如跑去 #美東村 對面嘅 #石屋家園 食個tea飲杯嘢再跑啦!。石屋家園係三級歷史建築,早係40年代建於何家村嘅位置。石屋係中式傳統設計,外牆用花崗石同磚塊砌成,屋頂用中式筒瓦同板瓦鋪設,而內部亦係以木製。日戰之後,石屋一帶成為寮屋區,而石屋家園嘅前身其實係墓碑廠嘅工場,專門做墳墓上面嘅石碑㗎。後黎寮屋區係2001年全面清拆,就淨返依座石屋。依家石屋已經成為旅遊景點,入面有咖啡冰室,亦有文物探知館開放比大家參觀。



補完水就起步往黃大仙方向跑,我地會去到一個應該大家都認識嘅地方——嗇色園黃大仙祠!黃大仙祠同時奉行道、釋、儒三教,每年都吸引好多人同旅客黎。黃大仙信仰早係二十世紀初就傳入香港,黃大仙15歲就開始學道,因為佢「有求必應」,所以成為左道教中為人景仰嘅神明。



再向鑽石山方向跑,好快就會見到 #志蓮淨苑,好多人以為呢一座佛寺外觀新淨,應該歷史唔算悠久,事實上志蓮淨苑響1934年已經成立,除咗提供地方比僧侶清修之外,亦開辦義學比當時嘅貧苦大眾有接受教育嘅機會。於1988年,因為政府興建大老山隧道,所以需要清拆原寺,後來由政府支持及熱心人士募捐下於現址重建。無論你信唔信佛教都好,入邊嘅建築都好值得大家入去觀賞,不過記得尊重佛門重地,唔好大聲喧嘩同食嘢呀!


到最後大家可以跑到去彩虹地鐵站附近嘅 #牛池灣鄕,呢條村其實已經有二百幾年歷史,孫中山嘅兄長孫眉亦曾經住過喺呢度,由於城市急劇發展,呢度只係剩低一啲寮屋同鐵皮屋,不過呢度嘅街市有好多特色小食,街市入面仲有一間隱世嘅麵包舖, 如果你係八九十年代響公共屋村長大,呢間麵包舖一定俾你好多回憶!



跑到黎呢度已經11公里,大家可以借用牛池灣體育館嘅洗手間換衫,再選擇坐港鐵或者巴士小巴返屋企。如果想試吓呢條路線嘅朋友,要記得以下要點:

1. 跑街重點並非速度,事實上跑得太快亦都累人累已,大家可以以6分至7分1公里嘅速度慢慢感受舊區嘅風味,千祈唔好跑咁快呀!

2. 盡量避免返工放工時間跑,其實跑呢啲舊區最佳時間係假日嘅上晝,所有景點同舖頭都開咗但係又唔算多人,大家可以跑跑停停,影吓相飲吓嘢感受下。

3. 城市跑一定會過馬路,大家千祈唔好衝紅燈。

4. 最好孭一個小小嘅跑袋,隨身攜帶水,銀包,手機同替換衫褲等,跑完可以玩件衫舒舒服服咁走,又唔使驚臭親人。

5. 盡量唔好用訓練嘅心態去跑呢啲路線,輕輕鬆鬆當儲下里數同朋友傾吓計咁就最好玩。

6. 疫情期間最好就帶返個口罩跑啦。

唔知大家有冇平時鍾意跑嘅城市街跑路線呢?如果有嘅,不妨響留言同我哋分享!希望大家跑得愉快,長跑長有!



0 comments