• runforgoodhk

九龍晨運山串遊




大家有冇諗過,綠油油嘅郊野其實近在咫尺?九龍區其實有好多隱世嘅小丘,山唔高但係好有趣味,有啲路段甚至有蚺蛇尖等等名山嘅影子,最重要係,全部響正市中心!唔需要搭個幾鐘頭車先至去到,而且體能要求相對簡單,最適合想打卡冇體能零裝備唔運動又想郊遊嘅你!當然,如果你對自己嘅體能有信心,小編之前一口氣跑晒咁多個山,總長度都係20公里左右,無論你係想逐一擊破,抑或一次過跑哂咁多個山,千祈唔好錯過我哋嘅分享呀!


首先,點解叫晨運山呢?又應該點定義一個山係咪晨運山?獅子山都好多人晨運架喎,咁又算唔算係呢?當然冇一個定律嘅,不過小編認為,晨運山需要符合以下條件:

1. 高度200米以下(唔太高先至老少咸宜嘅)

2. 比高樓大廈緊密包圍(交通一定方便)

3. 一定要有綠油油嘅樹林同非石屎山路(所以唔好問點解禮頓山唔係)

4. 有名(葵涌公園都有個小丘不過冇名)

小編做咗個非正式統計,九龍區內符合以上條件總共有以下幾個晨運山(高度只係大約估計):

1. 嘉頓山(90M)

2. 主教山/窩仔山(86M)

3. 採石山/紅燈山(90M)

4. 格仔山(98M)

5. 斧山(110M)

6. 平山(186M)

7. 沈雲山(177M)

(編按:其實仲有個77米高嘅白鶴山響樂富華人基督教墳場隔離,不過佢黐住咗個墳場,同埋上面山路茂密,所以好小人行,唔建議大家去啦)

事實上,呢啲晨運山由於貼近民居,好多公公婆婆會自發建造一啲晨運亭或者運動設施比大家一齊做運動。唔好以為DIY就好簡陋,好多時都有枱有櫈有靚景,好chill架!有啲山仲好有歷史背景,當係歷史深度遊又好,本篇郊遊行吓山又好,都好值得大家探索一下。事不宜遲,即刻帶大家串遊九龍晨運七山!

第一山:嘉頓山

嘉頓山相信大家一定聽過,近呢幾年已經成為打卡熱點。由於交通方便,好多人會上去睇日落同九龍都市景。如果你未去過,佢嘅位置其實位於深水埗美荷樓(前石硤尾村,亦為第一代香港公共房屋,現已拆卸,僅餘美荷樓作為青年旅社及展覽館之用)後方,由深水埗地鐵站行過去只需10分鐘左右。如果你想一次跑哂七山,可以選擇以美荷樓做起點。

好多人上嘉頓山只為風景,但係小編建議大家可以先參觀美荷樓展覽館,嗰度展示左香港公共房屋嘅發展,如果你同小編一樣響公屋長大,你一定會流連忘返,所有回憶返哂來!

講返嘉頓山,一條長長嘅樓梯上到山頂,對於跑開步嘅你可能只屬熱身,不過純粹郊遊來講,呢條長樓梯都好攞命下,一步一步慢慢上到頂,你就會見到一個開揚嘅都市樓景。有舊樓有新樓有寫字樓有屋邨有居屋有獨立屋有平(貧)民窟,香港璀璨貧窮一面盡收眼底。山頂亦都有枱有凳,有啲人會買啲小食嘢飲上嚟傾吓計吹吓水,好chill下架!當然記得自己垃圾自己帶走啦!



(九龍市區景盡收眼底)

(山頂平地, 老少咸宜)

心水清嘅你你可能會問,嘉頓山上山路線成條都係石屎路,冇山路喎!事實上,大部份人睇完就會沿路折返,其實沿山頂行北行,你會發現有條細細的絲帶路,沿住呢條絲帶路就可以去到澤安道南。千祈唔好睇小呢條絲帶路,你見到沿路都有晨運人士自設扶手繩就知道有幾困難,某部份嘅斜度更加媲美狗牙嶺!大家行嘅時候千祈唔好掉以輕心!




(咪睇少呢幾步, 斜度驚人!)

出返出返澤安道,右轉南昌街窩仔街巴域街,我哋就會去到第二個晨運山:主教山/窩仔山


第二山:主教山


由於出土羅馬式建築文物,主教山近期鬧得熱烘烘,好多人慕名而來。事實上,根據維基百科所記載:‘窩仔山是區內居民一直所稱呼的名字,於戰後報章和地圖開始已有紀錄。其名字源自於地貌,窩仔山東南面有一個獨特凹陷的窩仔地形,山中有窩。戰後這裡成為木屋區。別名主教山來源則是由區外人士因山周圍有不少基督教教堂從而稱呼而來,但窩仔山上從來沒有興建過天主堂,也沒有主教住過。’ 事實上,除咗古蹟之外(其實已經圍封咗睇唔到)主教山仲有另一面好值得大家去感受同欣賞!






主教山由於接近深水埗及石硤尾一帶,好多附近嘅居民會響山上面晨運。佢哋自設嘅晨運設施令小編大開眼界!除咗晨運亭麻雀雖小五藏俱全外,仲有好多適合老人家用嘅健身設施,最厲害係佢哋嘅乒乓球設施,基本上每隔幾百米就有乒乓波枱,有啲較為平整嘅位置甚至乎會擺咗四五張枱響度,附近仲圍左網以免啲波飛落山執唔返!小編跑過嘅時候見到每張枱都有人打,水平仲要相當高!呢啲土炮製作又健康又有用,使用率又高,而且大家有規有矩,絕對唔會出現有波冇人打或者有人冇波打嘅情況,實在比康文署嘅設施有過之而無不及!呢度展現出嘅生命力實在令小編動容不已。

上完山當然要落山,可以肯定大家即使有地圖都一定會迷路,因為實在太多路啦!不過冇所謂啦,有時未知嘅感覺其實更加迷人,大家可以享受下漫無目的信步走走嘅悠閒。當然如果你要趕路跑晒七山嘅就要向着大坑東方向走,落到大坑東運動場向界限街公主道佛光街常盛街跑就會去到第三個晨運山-採石山/紅燈山。



第三山:採石山/紅燈山



顧名思義,紅燈山上面以前真係有一盞大紅燈比飛機升降,咁當然如果你係2000後出世嘅朋友,你就未必經歷過啟德機場時代,亦未必知道以前飛機原來就響九龍城一帶低空降落。小編以前就住喺紅燈山附近,天氣好就會上山頂睇飛機升降,好壯觀㗎!其實紅燈山又名採石山,據講呢度以前係石礦場,政府會響度採石,因此得名。山頂上面有足球場,可以俯瞰土瓜灣九龍城一帶嘅新舊發展,亦可以眺望畢架山獅子山同飛鵝山,風景相當怡人。呢度仲有一個隱世網球場,小編經常跑過都見長期空置率相當高,估計未必好多人先到呢度有個咁正嘅網球場,鍾意打網球嘅你唔好錯過。不過落山嗰陣就要打醒十二分精神,因為由山頂落何文田地鐵站會經過一條長樓梯,雖然有扶手,但係斜度驚人,而且另外一邊就係接近垂直嘅護土牆,一個唔留神就真係會出意外,大家記得看景不走路呀!





落山之後沿着靠背壟道天光道法國醫院聯合道就會去到樂富公園,沿着富安街就會上到第四山-格仔山。


第四山-格仔山

格仔山南面有一幅好大嘅護土牆,牆上面以前畫咗塊好大嘅紅白相間嘅格仔,如果以前有響九龍仔運動場跑過步就應該會見過。同紅燈山一樣,呢塊格仔係以前比飛機升降之用,不過時移世易,塊格仔已經不復存在。格仔山頂行一個好大嘅草地,如果你一家大細週末想搵地方野餐,呢個絕對係一個好地方!呢度風景同紅燈山不遑多讓,不過地理上更加接近獅子山,好有獅子山下嘅感覺!作為跑友嘅你,如果你堅持每個山都要行下佢嘅山路,呢個山有條標高柱,柱旁有一條隱蔽山徑落山,呢件山徑斜度高而且路況差,得閒嘅時候要小心啲呀!


(落山路況較差, 而且出口位於垃圾收集站內, 是否選擇山路, 你自己揀!)


落返山就返聯合道摩士公園東頭村道彩虹道鑽石山志蓮淨苑上斧山道平定道登第五山-斧山。



第五山-斧山



斧山道運動場大家可能聽過,但係知唔知佢背後嘅山其實就係斧山?由平定道出發,上山當然有又長又窄嘅樓梯啦,一路上山頂都比密林遮住嘅冇乜風景睇,樓梯上到山頂記得轉右行小路,因為行多兩步你就會見到另一個中晨運人士自製嘅觀景台,呢度俯瞰運動場同啟德發展區一帶,坐響亭入面由晨運客設置嘅坐椅上面,呷一口自帶熱茶,不羡仙。




坐完嘆完繼續沿山路走,你可以選擇落山或者繼續向山頂進發。向山頂進發嘅話,你會見到另一個晨運園地,呢度冇之前嘅晨運園咁多設施,反而有幾舊奇石,你想去望返住之前嘅風景,頗有大地在我腳下嘅氣勢,落山大家可以選擇往牛池灣公園方向,沿豐盛街牛池灣街去新清水灣道,到達新清水灣道時大家需要過對面馬路,大家緊記使用附近天橋,雖然行多兩步,但係安全好多。沿新清水灣道往順利邨方向跑兩步就到達平山嘅入口。

第六山-平山

平山西面前身係平山石礦場,1975年因為要興建地鐵觀塘線而關閉。礦場一直荒廢,直到2000年左右先至開始發展公共房屋,而家彩盈邨,彩德邨同彩福邨就係礦場舊址。沿住呢幾條村側邊有一個巨大嘅護土牆就係剩餘嘅平山山體。沿新清水灣道直上,大家可以搵到入山嘅石屎路,大家除咗可以選擇樓梯直上,其實旁邊巨大護土牆旁都有樓梯可以上山,小編望過呢條天國的階梯,延綿不絕,恍如直通天堂一樣,好有氣勢。有啲梯級又窄又高,不過旁邊有欄杆保護,行起上嚟個心都定啲。上到樓梯頂望返轉頭, 仲可以望到高清嘅飛鵝山景,如果有爬開石嘅就會好清楚見到自殺崖,天鷹石,九月璧,倚天石,大石鼓等等知名石牆。再上多幾步就會見到平山嘅標距柱。打完卡向南走就會去返佐敦谷,沿山脊一路落山,右邊筆直嘅崖邊就係彩福邨,響密麻麻嘅石屎森林中間有個真正嘅樹林,呢個真係香港獨有!



(彷如通往天國的階梯)



(有些台級, 僅容半隻腳板!)






落到佐敦谷就會見到一條水壩,呢條水壩就係當年佐敦谷水塘嘅主壩,唔講唔知,原來以前呢個位置曾經係佐敦谷水塘,不過呢個水塘主要係儲存鹹水,為牛頭角一帶嘅居民同工廠提供沖廁水之用,同時都係已消失嘅七號墳場原址,曾經係一片荒塚。當然時代巨輪下所有建設都灰飛煙滅,只係剩返呢一條水壩比大家緬懷舊事。不過條水壩望出去嘅景色都相當特別,綠油油嘅樹林加石屎森林,中間仲有一條佐敦谷渠點綴,相當特別。過完壩就去埋最後一個山-沈雲山。



(佐敦谷水塘嘅主壩同佐敦谷渠景色)

第七山-沈雲山

上沈雲山嘅路相當陡峭,實在有少少蚺蛇尖嘅感覺。唔同嘅係,呢度有好多晨運客自設樓梯同扶手繩,行起上嚟相對容易。沿山路上走,回望返平山一帶,你會欣賞到平山平緩一面,如果大家想感受行陡峭山峰嘅難度,又擔心自己體能未必應付到,沈雲山就係一個唔錯嘅選擇。儘管山勢陡峭,不過沈雲山高度只係177米,緩步而行半個小時左右應該點都可以登頂。山頂係另外一個好適合野餐嘅草地,而且遙望港島柏架山同鯉魚門一帶,風景相當怡人!怕辛苦嘅朋友其實亦可選擇以順安道嘅石屎路上山,比較容易應付但亦稍欠樂趣。




(回望平山及飛鵝山)




(山谷景緻)




(山頂配水庫景色截然不同)



跑完晒七山嘅朋友們,可以選擇順安道康寧道物華街裕民坊到觀塘港鐵站完成路線。呢條路線其實相當特別,行開山嘅朋友未必有興趣行咁多街,跑開街嘅朋友又未必有興趣跑咁多山,練長課嘅朋友會嫌跑街多紅綠燈,跑開山嘅朋友又會嫌石屎路太多,不過,對香港歷史有興趣,又鍾意捐窿捐罅嘅跑友,呢條路線應該好適合你。當然都提醒各位有興趣挑戰嘅朋友以下嘅跑街要點:

1. 跑街重點並非速度,事實上跑得太快亦都累人累已,大家可以以6分至7分1公里嘅速度慢慢感受舊區嘅風味,千祈唔好跑咁快呀!

2. 盡量避免返工放工時間跑,其實跑呢啲舊區最佳時間係假日嘅上晝,所有景點同舖頭都開咗但係又唔算多人,大家可以跑跑停停,影吓相飲吓嘢感受下。

3. 城市跑一定會過馬路,大家千祈唔好衝紅燈。

4. 最好孭一個小小嘅跑袋,隨身攜帶水,銀包,手機同替換衫褲等,跑完可以玩件衫舒舒服服咁走,又唔使驚臭親人。

5. 盡量唔好用訓練嘅心態去跑呢啲路線,輕輕鬆鬆當儲下里數同朋友傾吓計咁就最好玩。

6. 疫情期間最好就帶返個口罩跑啦。

希望大家跑得愉快,長跑長有!


0 comments

© 2020 Run For Good.