【開心親子行-帶B全走麥徑100公里 第四集】

順利完成好有挑戰性嘅馬鞍山，之後由 #扎山道 到 #城門水塘 會唔會無風無浪呢？一齊睇吓Norman一家第四日經歷啦！

汲取琴日教訓，唔想太晏起步，所以琴晚行完就快快手買定所有食物，第朝一早起身可以早早準備。見琴日個烏冬幾好食所以今日嘗試再炒多次，同埋預計第四日會比較輕鬆，所以特登整埋醉雞翼，再加少少燒賣魚旦，成件事非常郊遊mode！

是日特登六點早起預備午餐，去到扎山道觀景台都只係九點左右，經過M100標距柱梗係打個卡紀念咁有歷史性一刻！（因為代表着行程已經完成一半50公里），沿住車路去到 #獅子山 腳就慢慢再上山，今日唔知點解BB啱啱起步就要瞓覺，上咗百幾級樓梯就上背架俾佢休息下啦！

歷史性一刻!)

BB一上背架成件事就加速進行，輕輕鬆鬆行吓傾吓計就去到 #畢架山，落山時一個晨運地點，BB啱啱瞓醒，見到個咁靚嘅地方我哋決定食埋午餐先再繼續。筆架山一帶由於好近民居，所以有好多晨運人士自行開發嘅晨運地方，通常有枱有凳有健身器材，好多時仲附送一個靚景，好chill架！

今日嘅嘢食BB好鍾意，好快就食晒成碗烏冬飲埋奶，有咁大個平地俾佢自己慢慢走，爸爸媽媽就可以舒舒服服安安樂樂咁慢慢嘆啲醉雞翼，同BB影吓相又傾吓計咁，成件事真係好郊遊！之前題過，同小朋友去行山最重要唔係趕路，反而真係要預留足夠空間比大家休息同食下野，先至真正親子郊遊遊！

餐飯慢慢嘆咗成個鐘再起步，由於之前腳程快賺左啲時間，所以即使午餐食耐左都唔怕。BB食飽之後翻生所以可以俾佢行一段，尤其係臨落 #九龍水塘 之前一段嘅平路，BB好似開着turbo咁行吓跑下幾乎走晒成段！小朋友學嘢真係好快，第一日見佢行吓行吓唔係幾穩陣到今日可以放開手俾佢自己行呢啲山路，大自然媽媽的確係最好嘅老師！

差唔多到九龍水塘嗰陣，媽媽突然間話要換片，我快快手手搣爛條片（佢着片片褲，有經驗嘅爸爸媽媽都知道通常會搣爛側邊成條棄置），點知原來冇帶尿片！最後冇辦法之下就用咗媽媽件褸綁住個pat pat，準備快快手手行埋水塘同孖指徑一段就返屋企！

金山道上斜一段都唔敢放BB落嚟行，除咗驚佢會weewee之外，最重要係太多馬騮，跑開山嘅朋友都知其實馬騮非常惡，我自己就試過半夜比百幾隻馬騮圍住，仲要一齊狂叫，超級嚇人！所以呢段就快快手手放BB上背架快手走完！最後平安去到 #孖指徑，臨落山個位置再次欣賞一個超完美日落，同老婆一齊回顧之前走過嘅路，再望埋聽日要走嘅針草帽，又浪漫又完美咁結束旅程嘅第四日！

("而你使一天一天甜甜絲絲")

未完待續......