• runforgoodhk

【開心親子行-帶B全走麥徑100公里 第二集】



去到鹹田灣過咗一晚,究竟我哋一家第二日嘅行程如何?麥徑其中一段最難行嘅 #第3段,佢哋又有咩應對方法?大家快啲埋嚟睇啦!


Day 2 鹹田至水浪窩(約15KM)

一朝早就被海浪聲自然叫醒左,真係要再次感謝#安記士多 嘅溫先生借出士多一角俾我哋紥營,仲俾我哋無限熱水供應,可以煮嘢食比BB。琴晚好大風但係有幅牆遮一遮真係爭好遠,成晚暖粒粒唔需要擔心BB凍親。由於擔心第二日路程比較遠,上落差比較大,起身只係隨便食咗少少乾糧就出發,打算去到北潭凹先預備熱食。同BB出遊一定要帶備一兩個暖水壺,任何時間BB肚餓都可以即刻預備熱食。


(好好訓嘅一晚)


快快手執完裝備即刻開返架車仔出發!天氣好好,晴空萬里又唔太凍,#一路推住車仔同BB傾偈#跟手拖住老婆隻手仔,輕輕鬆鬆咁樣又行到去 #北潭凹(雖然上大浪坳嘅斜路推氣都咳!)。行開山都知,北潭凹係重要嘅補給點,有廁所有汽水機有涼亭,我哋就順便幫BB換片扔垃圾。係,冇錯,我哋呢兩日嘅垃圾一路跟身,即使西灣鹹田灣有士多有垃圾桶我哋都寧願孭出嚟先扔。呢個係以前 #外展訓練 嘅優良傳統,#自己垃圾自己帶走,同埋只用馬路邊有蓋嘅垃圾桶,咁就唔需要工人特登行一大段路收垃圾,亦唔怕野生動物摷垃圾破壞生態之餘又污染環境。


(推到氣咳嘅一段)


(終於出到北潭凹)


整完熱食,執整完行裝,我哋就call van仔,將BB車同唔要嘅行李先行送返屋企,輕身迎接 #牛耳石山 #雞公山 等等比較崎嶇嘅路段。一起步就要連續上幾百級樓梯去牛耳石山,又熱又曬BB又行得慢搞到我自己都發憫憎,好彩老婆無限耐性嘻嘻哈哈咁又到嶂上。呢度奉勸男士們除咗有足夠體力先好挑戰帶B行山之外,最緊要其實係要有個 #無限耐性 #賢良淑德 #溫柔體貼 嘅賢內助包容照顧!



嶂上去 #雷打石 一段樹陰較多相對易行,回返氣之後又開始肚餓,好彩之前一早預備多餘嘅熱食,響 #榕北走廊 起點嘅一片空地再次大休食嘢,同BB一齊行山,其中一個重點係要預備多啲嘢食同充足嘅休息時間,始終BB要休息瞓覺同定時進食,而且BB一定要預備足夠熱食。呢啲全部有老婆一早打點好晒,我同BB淨係食就得啦。


食飽休息完之後就開始趕路,因為到達雞公山腳已經接近五點,距離天黑剩返一個半小時,雖然有頭燈但係我哋都想盡量避免入黑趕路。去到呢刻BB都已經瞓咗,一路孭住BB一路上雞公山,令到呢段行過無數次嘅路段突然變得好浪漫,同BB零距離接觸咁行山,我諗BB成世人係得呢段時間先至有機會,佢再 #大個啲就孭佢唔起,佢再 #細個啲又驚佢太辛苦。上到山頂仲要有一個完美日落,呢段路程實在係非常難忘!



平時山頂跑落水浪窩20分鐘左右就夠,今日孭住BB放慢腳步就大約要45分鐘左右,落到山BB啱啱訓醒亦都啱啱天黑,同BB手拖手行幾百米到馬路就即刻call車返屋企煮飯休息。返到屋企又叉電又執嘢又沖涼,搞下搞下成十二點先瞓,訓果刻突然諗到,現代生活其實係咪太複雜?回想琴晚露營,我哋一家三口食埋飯沖埋涼九點幾佢全家人響個營入面傾偈休息,返到屋企反而又叉電又玩電話又覆email whatsapp又social media係要搞到半夜先瞓,現代人嘅生活,其實會唔會簡單啲反而開心啲?


下集再續........


0 comments