【開心親子行-帶B全走麥徑100公里 第三集】



響屋企充足休息之後,第三日上馬鞍山又係咪順順利利呢?大家繼續睇埋呢個 #帶B行100K 嘅故事啦!


返咗屋企瞓一晚,第日起身已經八點幾,執嘢煮早餐煮埋午餐搞呢樣搞個樣出門口已經係九點半,返到 #水浪窩 成10點幾先起步,對比起之前露營,其實返屋企花嘅時間仲多,咁當然都因為孭埋露營用品負荷實在太重,所以計過度過都係返屋企休息比較穩陣。一起步,BB鬼打咁精神全程石屎路佢行晒咁滯,當然代價就係成家人要慢慢行,兩三公里行咗個半鐘都有!好彩去到山腳BB要瞓覺,上返孭帶慢慢行上山開始追番啲時間。不過今日BB點名要媽咪孭,死都唔肯爸爸孭,咁就唯有辛苦媽咪。



一路孭到上 #馬鞍山。大約到頂前,BB就肚餓起身,好彩一早買定啲魚蛋燒賣,老婆又炒左啲烏冬,一早我仲叫老婆唔好拎咁多驚太重,點知好味到不得了幾下就食晒!


(臨尾醒返叻叻自己行)


由馬鞍山到彎曲山嘅風景同天色好靚,唔知係咪因為咁,BB心情都大好肯俾返爸爸孭。因為晏咗出發所以就快快手放佢落背架睇吓BB肯唔肯坐(之前主要用孭帶因為BB唔鍾意坐行山用背架),可能因為BB心情靚好順攤咁坐咗落去,見佢坐得開心,我都乘機行快啲追時間!不過響大金鐘附近有行山人士整親,見住飛行服務隊要吊救援人員落嚟,再接走受傷嘅行山人士,希望佢一切平安啦!都提醒下各位行山人士,行山始終有一定風險,所以行之前要準備充足,量力而為!


(直升機拯救中,希望一切安好)


(週山都係朋友)


可能BB之前行馬鞍山玩得太多,呢個晏覺足足瞓咗兩個鐘有多,快手快腳行到佢起身,我哋已經到達 #黃牛山 #水牛山 一帶。呢兩個山因為呢幾年好多人特登去 #天窗石 打咭而出名,如果大家週末想上去打卡,甚至需要排隊,認真誇張!


BB瞓醒當然又要再食飯啦!搵個位置坐低,食少少熱食就繼續上路,呢度都提醒下各位有興趣帶B行山嘅父母們,一個優質嘅保溫瓶不可或缺!我哋早上煮落嘅熱食到下午四點仍然熱辣辣,而且有足夠熱水沖奶比BB飲。


補充完體力就行埋最後一段,不過太太嘅膝頭哥開始投訴,呢個時候,兩支行山杖就大派用場!呢兩支陪我征戰多年行遍歐洲亞洲唔同山區嘅行山杖就陪我老婆渡過艱難嘅落山路段!正如之前提過,咁長嘅路線,體能裝備經驗都缺一不可。你永遠唔知道下一刻你會遇到啲乜嘢問題,只可以做好準備功夫。




好好彩,天全黑之前我哋就去到扎山道嘅觀景台,仲可以睇到一個超靚夜景,仲要咁岩有的士經過,快快手上的士返屋企整頓一下,再預備明天嘅行程。

0 comments