【開心親子行-帶B全走麥徑100公里 第一集】

Run For Good 創辦人 Norman

疫情持續整整一年，身為父母，呢一年我哋都盡量少帶BB出街，最多都係平日比較人少嘅時間帶佢行下山。早前老婆見到天氣非常好，怱發奇想，不如帶埋BB全走整條 #麥理浩徑？我聽到都即時打個突，‘得唔得㗎？‘ 不過話晒自己同老婆都係前 #外展訓練 #教練，無論體能同經驗方面都應該應付得到。最重要係，既然冇得去旅行，不如試吓放低電話全心全意同至愛一齊共渡旅程？當然，帶住兩歲唔夠嘅BB行咁遠係有困難，同老婆傾完之後，得出以下結論：

1. 旅程目的唔係挑戰自己，只係純粹同BB一齊享受大自然

2. BB嘅安全同舒適好緊要，所以唔使日日趕路，除咗第一日深入西貢一定會露營之外，其他路段夜晚行完就返屋企瞓覺，明早繼續

3.寧願自己孭重啲，BB用品一定要帶足

4. 每日大約行15-20公里，BB唔使行晒，不過只要佢肯行都俾佢行

5. 希望可以連續六日完成，令整個經驗更加圓滿

6. 始終疫情嚴重，都希望盡量避開人群，所以大部份路段選擇平日完成，同埋可以嘅話都帶住口罩行

諗完度完就出發，兩公婆快快手執完裝備，晨咁早就的士去到西貢 #北潭涌 嘅麥理浩徑起點，開始呢個 #小腳板走天涯 嘅旅程！

Day 1 北潭涌至鹹田（約18公里）

麥理浩徑行過唔知幾多次，高低起伏路況優劣心中一早有數，第一日由於要深入西貢，所以一定要帶埋露營用具過一晚。咁多裝備，左思右想唯有出絕招-帶埋超輕量版BB車！反正第一段有一半以上都係石屎路，山路就可以用個大袋pack起架BB車孭響身，重就重啲，除笨有精應該有着數！所以嗰日我同太太就一人一個大背囊，BB一開始就坐住車仔先啦！

(推呀推, 一路推)

第一日由於係星期日，萬宜路其實好多的士出入，好彩我哋起步時間算早，午飯之前已經行到東霸，BB都好乖咁瞓足全程，由東壩到浪茄都可以自己行到大半！當然，跑開山嘅我，呢啲龜速認真唔慣，不過好在老婆耐性無限，氹完BB又要氹吓我咁行到浪茄沙灘。BB見到沙灘超級興奮，跑下跳下去到沙灘盡頭，另一邊廂我就要pack好BB車，準備上 #西灣山。雖然已經做好心理準備啲行裝超級重，不過一孭上身嗰下都真係叫咗出嚟！一路上山，正值全日最熱嘅時間，好彩亞女聽話慢慢行行咗大半個山，不過最尾少少都係要抱抱，由於行裝太重，我又唔想慢慢行，唯有快快步行上 #西灣亭 先放低行裝，再空身跑番落去同亞女老婆一齊上山，去到山頂再自己跑返落去西灣亭拎返啲嘢慢慢行返上去，呢一段真係好甘！

(乖乖豬, 自己行)

(上山難, 落山都唔易)

以為落山容易啲啦，不過亞女又瞓着咗，老婆上左孭帶都只可以慢慢行，不過面對着 一尖四灣 嘅絕美景色，點辛苦都值嘅！行下行下終於落到 #吹筒坳，架BB車又大派用場啦！輕輕鬆鬆咁推到落去 #大浪西灣 已經開始日落，西灣到鹹田灣一段雖然有石屎路，不過都好多石級，為咗天黑前到達營地，我哋決定一個手抱BB，另一個用越野車嘅方式推架BB車上山！好在我哋特登借咗架又輕又硬浄嘅BB車，走下行吓又到達鹹田灣。嚟到呢度我哋離開麥徑向士多方向行（編按：玩過 #毅行者 都知麥理浩徑其實係唔經士多直出大浪坳），為咗減輕重量，我哋嘅晚餐就響鹹田 #安記士多 解決，老闆溫先生更加俾我哋響士多一角紥營，又免費比BB沖涼，喺呢度特別鳴謝溫先生嘅款待！同埋話時話，安記炒飯真係勁好食！

食完飯起左營沖完涼都只係九點左右，反正電話收唔到就早早入營休息，同BB玩一陣就響海浪聲下慢慢一齊瞓着，瞓着前一刻突然諗到，原來自己從來未試過全日放低手機全心全意咁同老婆BB一齊過，今日嘅旅程雖然辛苦，不過千金不換！

下期待續.....