【開心親子行-帶B全走麥徑100公里 最終章】

行完針草帽有啲攰，一樣夜晚買完嘢食就快啲瞓覺休息，第二朝唔覺意瞓晏咗少少，煮完買完上到荃錦坳都已經10點，起步嘅時候都有啲擔心，因為今日係全段行得最遠距離嘅一日（之前最遠都係20K左右），今日就要行26 K，仲要係最遲出發嘅一日，不過都冇辦法啦，唯有儘量行快少少追返啲時間。

由於今日絕大部份嘅路段都係石屎路，而最崎嶇嘅都係環湖路段（係，我哋決定行返舊麥理浩徑，即係環水塘，皆因風景較靚，同埋自己第一次行毅行都係行呢一段路段，想回味一下）所以就用返秘密武器-BB車！唔同嘅係，今次我哋用另外一部較堅固，同埋四條呔可以打氣嘅BB車，咁水塘路都唔怕啦！

坦白講，有行過毅行者嘅朋友都應該知道，最尾呢3段上落差雖然細，而且大部份係石屎路，不過就悶到飛起，不斷上上落落上上落落跟住就係咁落落落落落就會去到吉慶橋，中間都有個小插曲，話說途中爸爸需要開一個電話會議，咁媽媽為咗趕時間當然快步行先啦，點知聽完15分鐘之後足足追逐半個鐘頭先至追到推緊一部車仔嘅媽媽，所以真係不能睇小女士嘅毅力！

(一路追, 追到氣咳)

經過吉慶橋之後就向水塘出發，開始環湖之旅。大家要留意，如果你真係打算推BB車行呢段路，最好揀平日！因為而家呢度已經改成越野單車徑，即使係平日都有唔少嘅單車友喺度練車，好彩路段都算闊，同埋某啲較為狹窄崎嶇嘅位置就立刻收車手抱。所以一架摺疊方便輕巧而且用充氣呔嘅BB車都幾緊要！當然如果你帶住BB推住車仔，又唔打算行麥理浩徑，比較好嘅做法就係選擇一路行石屎路出大棠。

(BB好乖要自己行)

環湖嘅一段風景相當靚，湖中間有個島有啲哈利波特戲入面嘅影子，雖然未至於話參天巨木，不過形態同埋成個氣氛都好有歐洲嘅湖光山色。去到中段又係時候午餐，同琴日一樣都係食菜飯同少少魚蛋牛丸，由於要趕路所以好快食完就繼續起步！

去到環湖路段嘅尾段就有一條超長同崎嶇嘅樓梯，如果家長們真係決定要推車仔嘅話，就要預咗孭住架車仔去行呢段路，都幾唔容易㗎！不過整段路500米以下，行一陣就行完，好快就上返石屎路，跟住就一路推推推推推推到終點。過咗掃管笏之後就開始慢慢天黑，去到接近黃金海岸一帶，睇埋成條路最後一個日落，大家都不約而同停咗喺度慢慢享受，成個旅程其實大家都好唔捨得，好難得一家人全心全意咁過呢六日。尤其難得嘅係，BB一路都冇乜喊過，好享受成個旅程，成程仲牙牙學語咁同爹哋媽咪傾偈，呢六日大自然媽媽幫手教識BB好多嘢，BB無論行路講嘢同自理能力都好似叻咗好多咁！咁當然自己同好享受同太太嘅時光，雖然平時好多時間一齊，不過今次咁心無旁鶩好純粹地一齊經歷，實在係一個好難得嘅旅程。

睇完個日落已經天黑，慢慢一步一步行到最尾一段，BB好叻咁樣自己行哂引水道落山嘅樓梯，最後行麥理浩徑終點睇到影一張大合照，呢個旅程就真正完成啦！完成一刻真係好感謝太太同埋上天有個咁好嘅機會俾大家一齊享受同學習，希望我哋嘅經歷都可以感染到各位讀者多啲花時間同身邊人享受大自然啦！