【開心親子行-帶B全走麥徑100公里 第五集】

輕鬆完成城門一段，繼續前幾晚嘅策略，一早買定餸，第二朝晨早起身煮定熱食，早啲出發就唔使咁趕！連續食咗兩日炒烏冬，今次試吓整菜飯，清清淡淡健康啲，BB又鍾意食！

第二日咁啱有朋友得閒，約埋一齊就的士直上城門起步。啱啱起步就見到新鮮滾熱辣4徑完成者 #羅楚健，4徑係香港最長距離嘅比賽，參加者需要響限時內完成香港四條主要行山徑共298公里，而且完成者（finisher）更需要響60小時內完成，所以見到楚健跑過啊真係好似見到明星一樣，嗱嗱臨即刻同佢打張卡集個郵先！

(又HK100 Peaks, 又香港4徑, 點夠你玩呀楚大俠!)

唔知係咪BB選擇留前鬥後，今日起步冇幾耐就要抱抱，都好嘅，上針山咁斜嘅路段快啲放上背架行完，之後石屎路一段就可以俾BB自己慢慢行。針山係我其中一個最鍾意嘅山頂，尤其玩毅行者，可以一口氣由馬鞍山到畢架山望返自己走過嘅路，再遙望將要挑戰嘅草山同大帽山，好有滿足感！快快手欣賞完就落山，之後嘅石屎路BB都行得好開心，經過左幾日嘅訓練，爸爸媽媽開始放心比BB自己上落斜，小朋友嘅學習能力真係強！

差唔多到山頂，見到路邊有樹蔭又開始肚餓，咁就決定快快手食過lunch先。響呢個時候朋友突然響個袋度攞一份神秘禮物出嚟 - 係蜜汁叉燒！講真行山行得多，響個山度食叉燒飯真係第一次！啲叉燒仲要新鮮燒起，啲密汁撈落啲菜飯到真係好食到不得了！轉吓眼所有飯餸食度汁都冇剩，大家坐響度傾吓計曬吓太陽，BB又可以周圍走，所以好多時最令人快樂嘅事物往往都係免費嘅！

慢慢起步就向鉛礦坳出發，呢幾個月多咗人行山，呢條山路路段風化的確嚴重咗，響度都溫馨提示各位山友，情況許可下盡量選擇原有路段，唔好響旁邊隨便開發捷徑呀！

到達鉛礦坳，稍事休息就打最後大佬 - 大帽山。從延綿不絕嘅樓梯上大約45分鐘就會去到亂石陣，呢段相對較崎嶇，所以經過亂石陣之後先放返BB出嚟，BB亦都好似習慣咗，好乖好聽話咁響適當嘅時候先落地行。去到四方亭爸爸媽媽都有少少疲態，畢竟行咗五日，係幾攰嘅。不過目標在望，同埋諗到好快可以食蓮姐嘅燒賣魚蛋（蓮姐係邊個，唔使介紹啦掛？大帽山山后喎！）！

傾吓講吓捱下笑下，咁又上到波波頂，之後落山就好簡單，BB都趁呢個機會瞓過靚覺，差唔多落到山腳，竟然又見到另外一位神級跑手 - 曾小強以6分鐘1K嘅速度沖緊上山，好快咁打招呼後佢就風一樣咁跑咗去，認真厲害！

(幾時見到蓮姐都咁開心!)

終於落到蓮姐度，每次行到呢度感覺都真係好親切，見到蓮姐嘅笑容就好似見到屋企人咁，仲有狗狗廿八擺住尾咁歡迎你（佢叫廿八，因為蓮姐年廿八嘅時候收留佢），雖然今日冇完美日落睇，不過溫暖感覺依舊！

明天再戰最後一段！