• runforgoodhk

【輝sir行山推介】舊筆架山隧道及北子午石

Run For Good同 輝sir Wong Ho Fai 會介紹四條就近行山路線,每條路線仲有分 #初級組

#高級組 路段。今日就同大家介紹第一條路線:舊筆架山隧道及北子午石探索遊!


初級組路線:九龍塘地鐵站-哥和老街-畢架山隧道-筆架山道-龍翔道天橋-龍欣道-筆架山山頂-戰前座標石-北子午石-回歸亭-獅子山公園-樂富或黃大仙地鐵站

長度及難度:約7公里,初至中級(筆架山落子午石路徑較斜及跣,宜量力而為)

香港歷史,其實真係引人入勝,而且文物往往隱藏山野之中。今次路線首先帶大家睇吓有百年歷史嘅舊筆架山隧道。如果你響60年代前搭 #柴油火車 去新界,就係行呢條單線行車嘅 #舊畢架山隧道。由於交通逐漸繁忙,單線已經不敷應用,所以先至有而家呢條新嘅畢架山隧道,而舊隧道就轉做煤氣管道。



睇完舊隧道就一口氣龍欣道轉 #麥理浩徑#筆架山頂 打個卡睇九龍半島全境同維港風光,之後再沿麥徑去 #軍事座標石,座標石南面有一條小徑,沿小徑下山走大約五百米就會去到路線另一景點 - #北子午石。大約一百年前,時鐘手錶未普及前,香港天文台 HKO 其中一個主要職責就係報時,所以天文台當時就響維港南北兩岸各建一條子午石,方便船隻搵出子午線作報時同定位之用。筆架山呢支北子午石由於日久失修,已經相當破落,只係靠有心人用樹枝天幕簡單保護,如果大家去到,記得千祈唔好觸摸同行得太近呀!睇完就可以沿路返麥徑到回歸亭獅子山郊野公園再去樂富或黃大仙地鐵站散隊。




(想知多啲關於北子午石歷史,可以睇天文台節目「消失的魔法石」:https://youtu.be/VKivvptpYCo )




高級組路線:可以響龍翔道天橋唔上龍欣道落橋後向獅子山隧道方向沿龍翔道走大約五百米,護土牆沿小路上山。

不過坡度大,浮土碎石多,而且容易迷路,只宜有經驗人士,大家要量力而為呀!





溫馨提示:

無論係初級組定高級組路線,大家都要注意安全,量力而為呀!走嘅時候記得拎埋自己啲垃圾呀!#自己垃圾自己帶走


0 comments

© 2021 Run For Good.