【輝sir行山推介】維多利亞城界碑及南子午石
上次講完 #北子午石，唔知大家有冇趁住假期去行下呢？如果未行，大家可以PM我哋share返路線嘅GPX file俾大家跟住行！事不宜遲，我哋即刻睇埋第二集- 維多利亞城界碑同南子午石！
初級組路線：銅鑼灣地鐵站時代廣場出口-跑馬地-黃泥涌道-藍塘道-大坑道-寶雲道（或者慳返上山銅鑼灣的士直上司徒拔道寶雲道交界直接開始都得）-維多利亞城界碑-姻緣石-南子午石-灣仔峽-香港仔水塘道-香港仔市中心
長度及難度：約8.5公里，初級（全程石屎路，惟灣仔峽及南子午石一段較斜，如果全走整條路線，緊記帶夠糧水同預留充足時間）
今次路線響 #時代廣場 出發， 經跑馬地藍塘道上大坑道入 #寶雲道，進入寶雲道後大概500米就會見到第一個景點 #維多利亞城界碑。原來殖民地時代，中環一帶係香港嘅中心點，當時政府稱附近一帶為 #維多利亞城 或 #四環九約（四環指 #中環 #西環 #上環 及 #下環，下環於後期分為金鐘及灣仔等地區）。政府就用呢啲界碑去劃分維多利亞城位置，由於城市發展同填海等原因，最後全香港剩返六支界碑咋！
（全港剩返六支嘅界碑，希望唔會繼續減少啦！)
打完卡就繼續向前行，大約一兩公里後就到達另一個景點-寶雲道 #姻緣石，據講姻緣石可以令人「求配偶得配偶，求子嗣得子嗣」，係咪真係咁靈驗就見仁見智，不過上面嘅風景就真係冇得頂，一片青蔥翠綠之中可以見到中環灣仔一帶嘅繁榮。
(依個位望落去啲景都真係幾靚架😆！)
原路落返寶雲道繼續行多500米左右，大家會見到一幅毫不起眼嘅護土牆，沿着旁邊嘅樓梯直上，兩三分鐘後就會見到路線另一個重點 #南子午石。比起 #北子午石，呢支南子午石相當完整，不過大家都要好好保護佢啊！
如果想知多啲背後嘅故事，記得重溫香港天文台嘅特備節目-消失的魔法石。
節目傳送門：https://youtu.be/cqEURJaABKI
路程繼續，再治寶雲道向西走，1小時左右就會去到灣仔峽，轉左直上就可以去到山頂警察博物館，然後可以接香港仔水塘道去香港仔散隊。如果想早啲散隊嘅朋友們亦可以選擇灣仔峽轉右落灣仔地鐵站，又或者上走灣仔峽轉荷蘭徑出馬己仙峽道。呢條路線全程石屎路，又有好多中途撤走嘅選擇，好啱一家大細一齊行㗎！
高級組路線：大家可以響姻緣石後面嘅小路繼續上山到司徒拔道，於傲璇前維修斜坡樓梯小徑落南子午石。沿途有引路絲帶及前人留下嘅扶手繩，不過浮土碎石較多，坡度亦大。唔夠喉嘅可以沿路上返司徒拔道（又或者略過姻緣石，響護土牆上子午石再直上司徒拔道），經白壁旁小徑上布力徑金馬倫山接中峽落金夫人馳馬徑去黃竹坑海洋公園站散隊。路徑短不過坡度大，有經驗嘅你應該會覺得好好玩㗎！不過記得量力而為呀。
溫馨提示：
無論係初級組定高級組路線，大家都要注意安全，量力而為呀！同埋走嘅時候記得拎埋自己啲垃圾呀！#自己垃圾自己帶走呀嘛