【輝sir行山推介】摩星嶺二戰遺跡遊
一路行山，一路細味路徑背後歷史，比起就咁行有趣味好多㗎！上次同大家行完天文歷史，今次就同大家去 #摩星嶺 睇 #二次大戰遺址。
初級組路線：堅尼地城站-域多利道-摩星嶺平房區遺址旁小徑-摩星嶺山頂炮台-摩星嶺徑觀景台-域多利拘留所（白屋）-西環泳棚-堅尼地城站
長度及難度：約6.5公里，初級（可選擇全走摩星嶺徑，全石屎路）
摩星嶺係二次大戰香港嘅 #軍事重地，由於維多利亞港西邊出口闊達3公里，比起東面出口大概只得500碼左右，摩星嶺自然需要更強火力守護（關於維港東面海防歷史，極力推薦大家參觀 香港海防博物館），所以摩星嶺一帶，軍事遺跡處處。由堅尼地城站出發，經域多利道就會到達摩星嶺平房區（又稱為公民村），#公民村 係當年石硤尾大火之後政府撥地安置災民，災民只要向社會福利署登記就會攞到俗稱「白卡」嘅入戶許可證入住，高峰時人口多達1800人架！不過2001年已經拆遷。從遺址都可以見到當時嘅生活情況。
從公民村旁小徑上山，大概上走1公里左右就會到達山頂，如果大家有睇 #逃學威龍 第一集，其中一幕恐怖分子襲擊警察就係喺呢度拍㗎啦。事實上，作為軍事重地，當時其中一尊香港火力最強嘅炮台就係放咗喺呢度。大家上山嘅時候見到有一條好斜嘅石屎斜坡其實就係用嚟運送炮台上山用嘅。附近仲有好多宿舍同放置炮彈用嘅兵房，大家如果想kill標（跑山術語，意即到山頂三角網測站打卡）嘅話就可以沿小路行100米左右，可以遙望西高西崖，數碼港及南丫島一帶。
想知多啲摩星嶺嘅歷史，可以瀏覽摩星嶺之友網頁：http://www.fmtd.org.hk/
頭先沿小徑上山，落山就建議大家全走石屎路，因為其中會經過一個風景勁靚嘅觀景台，大家可以180度欣賞到東博寮海峽，眺望 #大嶼山，#喜靈洲及 #南丫島 一帶，天朗氣清時更可遠眺萬山群島（磯釣勝地）。
繼續沿石屎路落山，到達域多利道交界，大家就會見到 #芝加哥大學布思商學院。呢座咁靚嘅建築物前身就係 #域多利拘留所，又名 #白屋。回歸前，呢度係香港 #政治部 （係，逃學威龍入面個政治部）專門收容左派分子嘅拘留所，荒廢之後有好多電影都嚟呢度取景，其中 #色戒 入面易先生嘅秘密居所就喺呢度拍㗎啦！2013年呢度正式撥地芝加哥大學響香港設立布思商學院，2018年正式成立，校內嘅自修室，課室等都係經過活化嘅古跡。大家可以響大學開放嘅時間參觀，如果要入去睇就要打電話去參加佢哋嘅導賞團（不過疫症期間導賞團暫停，希望疫症快啲過去大家有得睇）。呢條路線極力推薦大家午後開始行，如果天氣好大家就可以响呢度睇到一個完美嘅日落。
在沿域多利道一路返去堅尼地城，途中會經過好有名嘅 #西環泳棚，呢座建於1960年代嘅泳棚，係市民想游水嘅其中一個選擇，當年因為未有公眾泳池，各區都有唔少泳棚俾市民嬉水，不過由於污染及發展，全香港而家就淨係得返西環泳棚。如果大家假日行呢條路線想響呢度打卡，就可能要預留啲時間排隊啦，因為太受歡迎關係，好多龍友們會響呢度取景。
高級組路線：堅尼地城站經龍華街到觀龍樓旁樓梯上堅尼地城臨時遊樂場，再從籃球場旁隱蔽小徑上山走絲帶路至摩星嶺徑盡頭逆走 #摩星嶺之友徑。沿途會經過覆修古道，如果大家想挑戰高難度，於摩星嶺之友徑編號18號後尋覓左邊隱蔽絲帶小徑直上標高柱，路經陡峭得來有趣味。上山頂後可選擇馬路落域多利道又或者繼續逆走摩星嶺之友徑。
呢條高級組路線係四條入面算係最容易嗰條，大家如果試咗之前兩條初級組覺得能力尚可，不妨一試！
溫馨提示：無論係初級組定高級組路線，大家都要注意安全，量力而為呀！同埋走嘅時候記得拎埋自己啲垃圾呀！#自己垃圾自己帶走呀嘛