【輝sir行山推介】張保仔古道至太平山

太平山應該好多人都去過,不過又有冇試過行張保仔古道上去呢?挑戰開高級組嘅朋友,又有冇試過由太平山北坡攻頂?我哋一齊嚟睇吓啦!



初級組路線:香港大學站A2出口-大學道-旭龢道-碧珊徑-寶珊道-張保仔古道-舊山頂道-盧吉道-克頓道-龍虎山瀑布-薄扶林道-蒲飛路-堅尼地城站

距離及難度:約9.5公里-初至中級(路程中只有張保仔古道比較崎嶇難行,其他路段則屬石屎路或易行山徑)

來到最後一集,無論初級組或者高級組嘅朋友都可以試吓一啲比較難嘅路段啦。首先由香港大學站出發上大學道經碧珊徑至寶珊道都係易行路段,唔想行咁多馬路嘅朋友其實可以的士直接去到寶珊道尾直接開始較難嘅張保仔古道路段。


張保仔就大家都認識,長洲張保仔洞相信大家應該都去過,但係大家又知唔知,相傳張保仔為咗容易喺中上環一帶秘密上岸,就開通左呢段張保仔古道。傳說係咪真就冇人知啦,不過呢條古道真係幾崎嶇,相對植被比較茂密,唔少路段都係人手用大石砌成,路口亦都比較隱蔽,於寶珊道末端轉右上山就係㗎啦。如果擔心應付唔黎,大家其實可以於寶珊道末端直走較為明顯嘅山路,有跑開超級馬拉松嘅朋友應該有聽過一個經典嘅比賽Round The Island (RTI),如果大家選擇容易路段,呢一段就係RTI賽道之一,沿路行你會見到用嚟標示賽道嘅藍色點。大概行700米之後就會有路口轉右接番張保仔古道較為容易嘅路段。張保仔古道上方其實亦都係攀岩勝地,如果響假日行過,大家可以隱約見到好多人響上面爬石架!



行完張保仔古道就會接舊山頂道嘅石屎路,沿着石屎路一路上就會去到山頂凌霄閣,大家可以響度補充糧水,又或者選擇搭纜車落山。不過我地就建議大家沿盧吉道繼續行,因為行大概400米左右就會有個無敵香港景,整個中上環同九龍半島盡在腳下,如果天氣好仲可以遠眺八仙嶺(真係見到架!),大帽山,靑山等等嘅香港名山!



沿着盧吉道去克頓道再接龍虎山健身徑,大家可以睇到龍虎山一帶嘅軍事遺跡,同摩星嶺一樣,龍虎山之前都係軍事重地,大家可以睇吓嗰度嘅碉堡及炮台等遺跡,睇完就可以沿路落去香草園,嗰度係漁護處開闢嘅農地,專門種植香草,香草園向西行大概200米就會見到龍虎山瀑布,呢度係附近晨運人士開闢出嚟嘅休憩地方,當日同Fai sir一齊行嘅時候就水源較少,不過相信夏天嚟嘅時候氣勢應該好唔同!瀑布兩旁仲有好多枱枱等等俾大家坐低休息下架。睇完瀑布大家就可以沿着薄扶林道蒲飛路去堅尼地散隊。



初級組路段除咗上山比較辛苦之外,要靚景有靚景,要瀑布有瀑布,中途仲有補給點同離開選擇,唔夠喉嘅朋友其實仲可以行多幾步連埋摩星嶺一齊行添!(想知摩星嶺點行就要睇返上一期啦)

高級組路線:張保仔古道到攀石牆一帶經北坡險崖直上盧吉道。

想挑戰高級組嘅朋友,千祈唔好見到成條路線一句講晒就以為好容易,呢條路線小編同Fai sir都一致裁定係五星級難度,冇豐富登險地同足夠裝備嘅朋友千祈咪試!因為路徑坡度極大,路徑亦不明顯,有某些位置甚至需要一定攀岩技巧,而且小部分路徑同攀石路線重疊,判斷錯誤分分鐘唔上唔落。不過應付到嘅朋友就肯定會好享受呢條路線,因為路線挑戰行山能力之餘,風景仲要絕美!而且打卡影相肯定唔使好似盧吉道咁同人爭餐死,不過真係要提醒下大家要有足夠準備,雖然某啲崎嶇路段有前人留低嘅扶手繩,不過都唔好完全依賴條繩呀!


溫馨提示:無論係初級組定高級組路線,大家都要注意安全,量力而為呀!同埋走嘅時候記得拎埋自己啲垃圾呀!#自己垃圾自己帶走呀嘛

0 comments