【行山考牌路線以外推介】鳯冠南北巖連走

*以下介紹路線，路徑崎嶇難行，導航亦不容易，只適宜有經驗及充足準備的山/跑友挑戰，荒野危險，切勿獨行。

上次介紹完四條考牌路線，大家係咪蠢蠢欲動想去試吓呢？事實上，行山真係冇分考牌唔考牌，小編製作呢四個行山考牌路線系列嘅時候，其實都發現咗好多好玩得來景色壯麗嘅路線，借機會同大家分享一下！

大家成日聽過鳳凰山，甚至乎上過唔止一次，其實圍繞鳳凰山有好多特色路線，人少之餘玩味濃，當然人少係有原因嘅， 因為呢啲路線普遍非常陡峭，而且導航困難，真係少啲經驗都搞唔掂。今次就同大家介紹鳯冠南北巖！

鳳冠南北巖，其實指鳳凰山南北邊嘅陡峭山坡。呢兩邊嘅山坡奇石處處，雖然難度高，但係好受有經驗嘅山友歡迎。今次介紹嘅路線由北到南，首先坐車去到昂坪市集，沿着一條平坦石屎路（大家好好享受呢條石屎路，因為去到行完前都唔會再有）去到心經簡林就會見到鳳冠北巖，天朗氣清嘅日子就會好清晰咁見晒成條路線。今次小編就選擇由倒碗下石河 起步。倒碗石河其實都係由巨石組成，沿石河上須要手腳並用，有啲石頭有成個人咁高，令小編回憶起以前響法國同瑞士行山同比賽嘅路段，雖然有啲困難但係危險性唔算太高。相反去到下石河頂橫移到上石河嘅一段就反而令小編心驚膽戰，狹窄嘅山路加細碎嘅石頭，左邊望返落山係筆直嘅懸崖，有啲路段甚至乎要手腳並用下攀一段，唔算困難但係非常險要。一路行嘅時候上望倒碗崖，真係難以想像有人徒手攀登咁險峻嘅懸崖峭壁！

橫移至倒碗上石河，跟住就連接北巖棧道。對比之前嘅路段，呢度相對容易好多，而且棧道更加會經過旄盔石，小天窗石，滴水岩等等嘅奇石，配合東涌機場一帶嘅背景，係瘋狂打卡嘅時候喇！

北巖棧道尾就係著名嘅一樹洞同埋羅漢塔，唔知係咪近天壇大佛，呢邊嘅景點除咗個名有詩意之外，仲好有禪意。一樹洞彷彿高僧入定閉關嘅地方，而羅漢塔又真係成個羅漢頭咁，如果大家要上羅漢塔影相千萬要小心，呢度曾經發生過嚴重意外㗎！不過事實係，行得呢啲險線其實任何時間都要小心！

影完相就可以沿羅漢峽落天門棧道，羅漢峽係一條頗直嘅碎石路，不過行完例碗石河嘅你，呢啲應該游刃有餘。峽底有分支路，分別去白顎棧道及天門棧道。由於我哋想走鳯頂 接斬柴坳落南巖棧道，所以今次選擇天門棧道。一開始就已經係手足並用嘅陡峭山路，不過由於前後都有大樹遮擋， 感覺唔太險要。相反到到接近山頂有一段橫移路段，在此見到前人樓下嘅扶手繩，你就知道又係挑戰膽量時候！不過呢一度嘅上落差同斜度都冇之前倒碗崖咁厲害，所以相對危險性小編反而覺得可以接受，向上行多幾步就到達北天門，可以飽覽石壁水塘一帶嘅景色，呢度亦都係香港三大險㵎鳳壁石澗 嘅頂點。

到達鳯頂，比假日嘅中環地鐵站更加多人，快快手影完相就即刻下降至斬柴坳，落多兩步就係小鳥回頭石，老老實實，呢啲石真係要有返咁上下想像力先至可以睇得明。不過唔明唔緊要，風景靚就得！小鳥回頭石後面嘅隱蔽小路就係南巖棧道嘅開端，沿棧道一路走，大家會經過鳳啄台，刀片石，卡通鼠石，陸上破邊等奇石。雖然你未必諗到點解舊石係改呢一個名，不過每舊石形態都好特別，經過呢啲石頭嘅攀爬過程刺激又好玩，小編就覺得比起一步一步行樓梯上鳳凰山頂更加有趣！當然都係果句，一切要小心小心小心！

經過卡通鼠石，遙望山谷對面嘅天窗石，中間嘅深谷就係著名嘅擎天峽！如果有充足安全準備又有豐富經驗，擎天峽係一個好好嘅挑戰！小編當天就只遠觀而不褻玩，打完卡就上去天窗石休息影相。天窗石係由幾舊石頭疊起嘅小洞穴，坐響個洞穴當中望出去，對面有一舊舊好似Lego砌出嚟積木崖。氣勢彷彿日本嘅名山槍岳！之後再沿山腰走，接南茶棧道 就會去到南天門。由於碎石連連，南天門頗有大峽谷嘅感覺！翻上南天門頂就可以接駁鳳凰徑再落伯公坳搭巴士返東涌離開。

其實香港實在美景處處，冇得旅行嘅其實探索香港境內奇觀怪石，肯定大家驚喜處處！當然如果要探索以上嘅險線，記得做足準備，切勿亂/獨闖！