【癲傻255KM體驗之旅 Day 1- 青衣到天水圍（約41公里)】

唔知大家跑過最長嘅距離係幾多呢？可能有啲人覺得 #全馬 已係極限，不過曾經代表香港出戰國際超級馬拉松嘅 #施Sir 響2014年就已經舉辦第一屆嘅 #癲傻180，以網上自發形式，號召香港長跑好手一齊挑戰個人最長里數，順便幫 #匡智會 籌款。日日跑步返/放工嘅施Sir，更加響當年首次挑戰180公里嘅距離！往後每年佢更加挑戰自己，逐年遞增里數，今年佢嘅目標里數已經去到 #255公里！由於疫症關係，今年由原本嘅實體跑變成線上跑，參加嘅朋友可以根據自己嘅步速同時間分段完成255公里嘅路線。Run For Good當然唔會錯過咁精采嘅活動，我哋會將路線分成五至六日，每日大約跑40至60公里，同大家沿途介紹呢條又癲又傻嘅路線！

Day 1 - 青衣到天水圍（約41公里）

路線起點響 #青衣運動場，雖然今次不限起點位置，但係我哋當然跟足全套！晨早到達青衣運動場，同癲傻Lego公仔打埋卡（每年施Sir都好有心咁製作Lego公仔比所有完成目標理想嘅朋友，小編早年曾經有參與呢個活動，所以今次特登帶埋呢隻吉祥物一齊跑足全程），跟住就正式開始呢個超長距離嘅旅程！

由青衣起步經過北橋，就去到跑友好熟悉嘅青山公路起點-荃灣西站。我相信好多跑友應該跑過呢一段海濱路，冇紅綠燈，上落差亦都唔算太大，補給亦足夠，所以好受跑友歡迎。當然一般跑友去到 #深井 就返轉頭，而癲傻路線深井只不過係一個補給站，之前同施sir跑嘅時候，佢跑咁長距離都係開緊6分鐘1K嘅速度，真係跑慢啲都冇水飲！當然今次小編就可以施施然飲下水影下相覆埋message再起步！

之後就會經過青龍頭一帶，呢度嘅海景靚到不得了！由青馬大橋一路望到機場，如果天氣好仲可以叫埋沙洲龍鼓洲海岸公園，香港三尖之一嘅青山頂亦都喺呢度慢慢出現，睇吓風景慢慢跑下去到 #屯門公路轉車站，呢度有個洗手間方便跑友解決。

跑下跑下又到 #黃金海岸，附近有好多地盤，加埋有好多大型車輛經過，沙塵滾滾都幾難頂，輕微加速快啲跑完去屯門補給好過。

(沙塵滾滾，不過花開燦爛，忍唔住拎癲傻仔出來影下相)

經過青山灣就會到達大會第二個補給站-輕鐵 #三聖 總站。呢個有便利店同麵包店，通常小編嚟到呢度都會食少少固體食物先至再起步，話晒都已經接近20公里，有啲嘢食吓好啲嘅！

(一路食包，佢一路望住我，到我分比佢又飛走左)

由青山灣到屯門市中心，如果走最短路線其實幾公里就完，不過又癲又傻嘅施sir點會咁容易俾你過關？呢條路線其中一個特點就係通常有海邊就一定會沿住海邊跑（其實冇海邊施sir都會特登跑出海邊），所以由青山灣開始就會沿海跑去 #蝴蝶灣，一路跑到去沙灘最尾嗰個位先返轉頭，再沿單車徑跑返去屯門河，之後就一直沿河跑去洪水橋。咁長距離中間大家可以選擇響 #屯門市中心公園 補給，不過今次自己跑，我就選擇快快手跑過，反正中間有好多汽水機俾大家買嘢飲。順帶一提，跑癲傻一定要確保八達通入足錢，沿途見到汽水機都可以即刻買來飲。

(屯門市公園，可略為補給，唔補就要走多幾K先有得飲)

(屯門河旁邊有啲好精緻手工製作，又係癲傻仔出場時間!)

#洪水橋 係另外一個補給點，有嘢飲有嘢食，稍事休息就再起步，開始進入 #天水圍 一帶。不過大家唔使幻想入天水圍市中心買嘢食，施sir當然唔會咁輕易放過大家，路線會由天影路一帶跑去 #濕地公園，如果大家有跑經典嘅天水圍10公里挑戰賽，呢段路應該都熟口熟面。大家記得洪水橋要買夠水，因為呢度一路都冇乜補給，最近嘅補給點都要去到朗屏，中間城十幾K 㗎！不過小編今次由於係第一日，身體未係好適應太長距離，所以牛刀小試 #41公里，順便跑去天水圍體育館沖涼換衫就完結今日嘅旅程。

(屯門河境同濕地公園河景大不同)

未完待續........