【城市綠洲跑最終章 - 屋村仔跑屋村】

唔知大家有幾多個好似小編咁都係 #公共屋村 長大架呢？其實公共屋村同香港嘅發展息息相關，從內裏嘅設計可以見到幾代人嘅生活模式同習慣，而且設計特別，好多龍友都會專程去到公共屋村留影。跑開街嘅你哋，會唔會選擇搵次放慢腳步，hea遊一下香港唔同嘅公共屋村？今次就同大家由深水埗 #石硤尾邨 出發，同大家一齊暢遊公共屋村！

小編早前約咗兩位 #TeamAnser（Run For Good同 #周子雁 教練合辦嘅跑會）嘅資深跑友一齊體驗，起點選擇響 #美荷樓 生活館，美荷樓其實係石硤尾邨僅存嘅建築，係當年第一代嘅公共房屋，1953年聖誕節晚上，石硤尾一帶嘅木屋區發生咗大火，除咗造成3死51人傷外，仲令五萬幾人無家可歸，為咗安置災民，政府就加速興建石硤尾邨，亦都係第一代嘅公共房屋。當時設計簡陋，廁所亦要每個樓層共用，可以想像到安全同衛生問題有幾嚴重。隨後7/80年代左右，政府開始陸續改善公共房屋設計，先至令市民生活質素得以改善。點解小編會知道咁多？唔係因為年紀大，係因為美荷樓被評為一級歷史建築，而家已經改建成青年旅舍，仲將其中一部份變成歷史展館，將當時環境同埋公共房屋嘅歷程展出。小編早前參觀嘅時候就流連忘返，皆因小編由細到大無論自己同身邊親戚朋友都響公共房屋長大，感覺特別深。雖然而家疫情下暫停開放，不過好建議跑有門起步前預留時間入去參觀一下，之後跑經其他公共房屋嘅時候會特別有共鳴！

起步可以跑去石硤尾邨，石硤尾邨其實正正展示左成個香港公共房屋發展嘅進程，由已經變成歷史建築嘅第一型徙置大廈，到較為新式嘅21-24座舊長形大廈（即係舊牛頭角上下村嗰隻，古惑仔電影嫲嫲嘅屋企），仲有最新型嘅非標準設計美菖樓，全部都係跑步距離，講真，深水埗地鐵站嚟到呢度1公里都唔夠，不過小編就用咗半個鐘影相同遊覽，因為實在太多回憶！啱啱跑友Jeffrey係則師，原來佢有份參與石硤尾邨第一期重建項目（#暴露年齡系列），大家不如聽吓佢嘅分享！

‘當時係啱啱畢業無耐，慶幸有份參與呢個項目。設計嘅時候想保留返原有7層高公共屋邨嘅設計特色，如果大家仔細留意外牆，你會發現到低層同中高層嘅外牆顏色同設計有少少差別。和同期嘅Y型及和諧式設計唔同，呢個係第一個非標準化嘅公共屋邨，原因係要避開下面嘅地下鐵路管道，為設計過程帶嚟唔少挑戰。大家亦可以留意，舊式同新式公共屋村嘅公共空間使用略有不同，呢樣亦係要響管理同使用當中作出平衡。

(新與舊相映成趣)

睇完石硤尾邨就可以向九龍塘方向出發，途中會經過另外一個舊式屋邨 #大坑西村，呢個並非普通公共屋村，第一條由 #香港平民屋宇有限公司 興建嘅 #私人屋邨，當時興建嘅目的主要係安置大坑西徒置區被清拆嘅居民，如果大家想去睇就快啦，因為呢條村將會清拆重建，呢條村響60年代建立，入面仲保留咗好多當時嘅店舖，好有香港特色，除咗包括大到可以比小朋友踢波嘅電梯口，一批幾十伙嘅超長走廊（呢樣野近年私樓都跟得好貼），仲有前牌熱議嘅中空垃圾管道（即係樓上扔垃圾就即係地下嘅大型垃圾收集筒），村入面嘅公共空間比其他公共屋村甚至私人樓宇更大更闊，大家可以見到當時居民生活嘅一鱗半爪。

(舊區情懷處處)

跟住就會經過九龍塘嘅豪宅群，小編抱住買唔到都睇吓嘅心情穿過，快快手就跑到去 #美東邨。呢條面臨清拆嘅屋邨，原來係另一個歷史遺跡。最早期嘅一座美東樓只有兩層，原來喺當時收地遇到困難，原本打算起高樓嘅計劃受阻，最後被迫只係起兩層，呢個設計響香港非常罕見。同石硤尾邨一樣，呢度包含咗幾代嘅公屋發展，由舊式矮層較闊落嘅設計，到了現代配套較好但係密麻麻嘅高樓，各擅勝場。想知多啲美東樓嘅歷史，可以按此睇返 #HK01 之前嘅報道。

(碩果僅存嘅兩層高公屋)

大家幾步就會去到 #樂富邨 同 #橫頭磡邨，原來以前呢一帶叫 #老虎岩，相傳因為附近岩洞曾有老虎出沒而命名（係，冇錯，香港真係曾經有老虎，大家可以按此睇返過往歷史），70年代興建地鐵嘅時候，樂富站原本更稱為 #老虎岩站，後來呢度興建左第一型及第二型徙置大廈（基本上同石硤尾邨設計一樣，都係要整個樓層共用兩個廁所，衛生同治安環境相當惡劣），之後徙置區被清拆重建公屋，政府認為老虎殺氣太大，所以先至取其諧音改名為 #樂富。跑到黎呢度，另一位跑友花子又有故事分享：

‘我以前細細個老竇就響老虎岩徙置區開茶樓，當時大概係70年代左右啦，以前公共屋村環境比較雜亂，衛生情況都唔太理想，但係左鄰右里關係就比較好啲，可能因為住嘅環境實在太細啦。你平時做乜嘢隔離屋都會聽到，夜晚黑又因為冇冷氣個個都會開門瞓覺，通常鐵閘加塊布遮一遮就算數，大家都冇乜秘密。由於附近有個墳場，所以逢親清明重陽茶樓嘅生意就好到不得了，拜完山就過嚟飲餐茶傾吓計，當時嘅生活比較簡單，同而家好唔同。‘

跑到過嚟樂富都5公里，雖然唔太長，不過傾吓講吓影吓相用咗幾個鐘，最後就搵地方飲杯嘢傾吓計，不過如果大家有興趣再跑，其實黃大仙彩虹順利邨甚至乎去到安達臣路一帶都有好多唔同形式嘅公共房屋，各有特色。事實上，香港周圍都係公共房屋，比如 #樂民邨 #西環邨 #勵德邨 #觀龍樓 等等都好特別，不過大家跑過就要留意以下事項啦！

1. 疫情未過，入村帶返個口罩就大家安心啲

2. 記得將音量收細

3. 呢啲屋村通常好多老人家，入咗村就記得放慢腳步，呢啲體驗式跑遊，真係唔需要快㗎

4. 大部份屋村都有閘口防止陌生人上樓，大家唔好夾硬入去，響村中間穿插其實已經夠玩

喺呢度，Run For Good仝人祝大家牛年身體健康，一切順利，最緊要 #長跑長有！恭喜恭喜！