【四大行山考牌路線推介】環湖出咀摸鬼手

*以下介紹路線，路徑崎嶇難行，導航亦不容易，只適宜有經驗及充足準備的山/跑友挑戰，荒野危險，切勿獨行。

2021年，小編首先祝大家來年長跑長有，踢走疫症，身體健康！新年唔知大家有咩大計呢？鍾意戶外運動嘅你，既然冇得去旅行可以行多啲山啦！上次介紹嘅兩條行山考牌路線杯靈雙渡，三牙全走 唔知大家有冇試吓呢？今日就等我哋介紹第三條路線，環湖出咀摸鬼手！

（船灣淡水湖）

呢度所講嘅湖就係船灣淡水湖，大家可以坐小巴去烏蛟騰 起步，上船灣淡水湖郊遊徑，一起步就需要登上馬頭峰，之後沿着山脊上上落落，可以遠眺吊燈籠，八仙嶺，馬鞍山 一帶景色。呢條路線有個特點，就係冇乜特別陡峭嘅高峰，不過同時間都冇乜平路，唔係上就係落，頭段上落波幅唔算好大，所以大家一開始之後過橫嶺，大峒，觀音峒應該感覺尚算良好。去到紅石門坳一帶，你會發現石頭開始變得赤紅，因為呢邊嘅岩石形成時非常炎熱，空氣氧化石頭內鐵質所引致，事實上呢條路線會進入香港地質公園範圍，岩石嘅形成同歷史都好值得大家研究吓㗎！

當去到鹿湖峒，大家就要留意自己嘅體能狀況同天氣時間等其他因素，如果大家決定出去摸鬼手，就一定要確保自己能力同裝備等都充足，如果有擔心就不如繼續沿船灣淡水湖郊遊徑環湖出大美督，切勿勉強。出鬼手嘅路口較為隱蔽，事實上整條出鬼手嘅小路雜草較多，大家最好着長褲保護自己，離開鹿湖峒後就會到達有名嘅跌死狗，顧名思義，狗都可以跌得死，即係路况差又陡峭嘅直壁，不過如果你挑戰過之前兩條路線嘅話，呢段應該係濕濕碎。之後成段路都係又密又多樹根kick腳又多上落又曬又悶嘅山脊路，最令人崩潰嘅係，你好清楚摸完隻鬼手要行返同一條路出去，個心會不期然咒罵隻手，同埋再次懷疑人生。

（紅白相間嘅沉積岩)

不斷上上落落兩三個鐘之後，你會到達有名嘅黃竹角咀，旁邊紅白相間嘅岩石係全港歷史最悠久嘅沉積岩，有大約4億年歷史，所以大家要好好保護咁珍貴嘅地質資源，千祈唔好攞走呢度嘅岩石呀！沿岸向北綑邊行大約500米左右就會到達鬼手。呢度大家要特別留意，如果潮漲時，某啲路段需要攀爬，遇上大風或者有時望大家有機會濕身， 甚至被海浪捲出大海，所以攀爬時要千萬小心。

（鬼手）

終於到達鬼手，行咗幾個鐘最後見到隻手，心入面百感交集，一方面你感動自己終於行到出嚟，另一方面你又需要無限輪迴懷疑人生 咁行返返出去，不期然仰天長歎 ’呢隻(爛)鬼手真係累人不淺‘。不過鬧還鬧，呢一帶嘅風景真係靚嘅，一路行出嚟除咗可以見到印洲塘往灣洲 等等嘅風景之外，仲可以遠眺赤洲，東平洲，天氣好嘅話仲會見到大鵬灣，南澳 一帶，所以，值得嘅。臨走嘅時候同隻手仔Give me five影吓相啦，不過記得千祈唔好企上去啊！

好啦，返轉頭嘅路就唔使講太多啦，咪又係不斷上上落落上上落落上上落落上上落落上上落落同埋上上落落囉！最終出返去郊遊徑路口，你鬆一口氣，想享受一下行返一啲正常山路嘅感覺時候，突然見到，往大美督嘅路牌上面寫住10公里，你立刻崩潰，然後暗暗祈禱條路可唔可以平返少少，不過一條又一條嘅斜路恍如錘仔咁一下一下將你打入十八層地獄，你對鬼手個‘鬼’字自然有更深一層嘅認識同體會。

終於，去到淡水湖嘅水壩，見返石屎路，你會歌頌人類科技發展，原來石屎路嘅發明係咁偉大。最後拖着恍如灌滿醋嘅雙腿躝返出大尾篤食飯。相信絕大部份嘅朋友嚟到呢一個位置已經差唔多天黑，既然係咁，不如去大壩欣賞埋個日落先走啦。望住個日落，我諗你心入面再次應承自己以後都唔行山。不過大家都心知肚明，行山界嘅三大謊言，好容易，就快到，以後都唔行，絕對不可信。反正都已經行咗三條考牌路線，不如搵日行埋最後一條一尖三咀過四灣！

呢條係四條路線當中最長嘅一條，全程大約30公里，一般嘅速度起碼要預留12小時先至可以完成呢條咁有挑戰性嘅路線。好多時山友輕視路線嘅長度同難度，往往行到入黑或者斷水斷糧，小編自己嘗試呢條路線都係啱啱入黑先至完成到，到大家記得要做好準備，帶足糧水同頭燈，先好挑戰呢條路線啊！

最後，無論去邊度行山，切記以下行山禮儀呀！