【四大行山考牌路線推介】三牙全走

*以下介紹路線,路徑崎嶇難行,導航亦不容易,只適宜有經驗及充足準備的山/跑友挑戰,荒野危險,切勿獨行。

上次介紹完杯靈雙渡,大家係咪心郁郁想即刻想行返轉呢?如果你行完覺得都應付到,咁就可以嘗試埋其他三條考牌路線!今次就同大家介紹氣勢雄偉嘅大嶼山三牙全走!

三牙,指鳳凰山以南石壁水塘對上三條陡峭嘅山脊,以方位分成東狗牙,中狗牙,同西狗牙,三牙所有路段都以浮沙碎石為主,某啲路段有直壁需要手腳並用攀上,路段欠缺大樹遮蔭,而且沒有補給,一般山友需要八至十小時完成。不過山勢雄偉,而且有湖景及海景,亦能遠眺鳳凰山 及天壇大佛,呢啲咁特別嘅景觀,實屬香港獨有。

路線起點眾說紛紜,有人堅持需要昂坪 起步,不過一般人都會取較方便路線坐巴士去到石壁水塘引水道開始,入山後取貝納祺徑向西走,見到白色西狗牙 三個大字都可以上山。一起步已經係一塊直壁考驗下大家挑戰三牙嘅決心,之後一路爬爬爬爬爬爬爬爬爬爬爬到懷疑人生 之後就開始見到鳳凰山同天壇大佛,西狗牙頂就係傳說中嘅一線生機,由於地勢險要,前人响呢度放咗條扶手鐵鏈。事實上呢度都曾經發生過致命意外,大家影相打卡要特別小心。


(虎吼石河)

影完相打完卡,如果覺得有餘力而且時間糧水亦充足(反之就繼續上攀取鳳頂,不而硬闖),就可以繼續往東狗牙 出發,東狗牙同中狗牙嘅頂點相當接近,而兩牙中間就係有名嘅虎吼石河,如果想打卡就千萬要小心,因為石河似緊實鬆,有下墜嘅風險,最好就遠觀欣賞下再繼續旅程啦!

東狗牙下山非常險要,筆直之餘路況以鬆土碎石為主,非常考驗山友們嘅平衡同下山技巧。不過如果上次嘅杯渡雙渡你都可以安然渡過,咁呢段應該都能應付。

(石壁水塘引水道)

落到盡頭就會回到起點石壁水塘引水道,意志堅定體力充足糧水足夠嘅你可以上返貝納祺徑再上中狗牙,當然力有不逮回頭是岸下次再戰亦絕對冇問題,畢竟個山永遠响度,人冇事先做到世界冠軍!

中狗牙景色基本同之前大同小異,而無限輪迴左三次嘅你應該都冇乜心情欣賞只想快快趣搞掂佢,再次爬爬爬爬爬爬爬爬爬同二次懷疑人生 之後你就會再次到達一線生機,開始腳軟軟嘅你過嘅時候真係要打醒十二分精神,響中狗牙頂回望三牙,你會有種莫名嘅感動,同埋你肯定會答應自己我以後都唔再嚟!

感動完畢,準備離開,你突然發現,原來前路仲有個最後挑戰閻皇壁,無野嘅,咪又係嗰啲好鬼直又跣嘅爬爬爬爬爬爬爬爬爬爬爬同三度懷疑人生 啫,考你唔到嘅,上啦衰鬼。

差不多上到頂,大家記得千祈唔好錯過有名嘅小鳥回頭石,上去同個雀頭影下相都幾靚架。同埋,你應承左自己唔再上嚟架嘛,冇機會再影架啦,快啲影多啲。

上多幾步就到達擔柴坳,大家可以接鳯凰徑 下走昂坪,順便珍惜一下行返啲正常山路嘅感覺,不知不覺落到昂坪,已經又攰又餓嘅你洗個面食啲嘢就可以搭巴士或者360返東涌,有力嘅亦可𣈱遊大佛寶蓮寺。

三牙全走,既直且險,其實求其一隻牙已經非常好玩,行山其實只為樂趣,無需為考牌唔考牌呢啲虛名逞強,都係嗰句,最緊要大家玩得安全,量力以為,以山會友,各位施主,切記切記

最後,無論去邊度行山,切記以下行山禮儀呀!



0 comments