【四大行山考牌路線推介】一尖三咀過四灣

*以下介紹路線，路徑崎嶇難行，導航亦不容易，只適宜有經驗及充足準備的山/跑友挑戰，荒野危險，切勿獨行。

最後介紹呢條路線，小編試行當天竟然遇到兩個彩蛋！第一個彩蛋係，當天係 Elton Ng 吳俊霆 's Adventures 三日内全登香港最高100座山峰100PeaksHK 最後一日，而蚺蛇尖 正正就係佢哋嘅最後一個高峰！小編有幸見證咁歷史性嘅一刻，真係與有榮焉！Elton Ng 同佢拍檔楚健三日不眠不休行哂咁多個山，高度爬升超過20,000米，不愧為山界外星人，而佢哋更加係為香港移植運動協會 籌款，想支持佢哋嘅，記得撳以下連結捐款呀！

捐款傳送門：http://bit.ly/3rryD3K

另一個彩蛋就係，竟然喺山頂比小編野生捕獲運動界KOL，山界女神，前三項鐵人代表隊 Vincci Hui 許煒森！仲有機會同佢行咗一段，知道多啲佢作為運動員轉型商界嘅心路歷程。如果大家想知多啲佢嘅故事，可以follow佢嘅fb同ig架！

好啦，講返條路線先！一尖，指嘅係香港名山蚺蛇尖，而三咀就係米粉咀，短咀，長咀。而四灣包括東灣，大灣，鹹田灣，大浪西灣。整條路線大約27公里。呢條路線景觀一流，除咗壯麗嘅大鵬灣之外， 仲可以遠眺南中國海，真正見到水天一色，當然難度亦都有返咁上下啦！

由北潭坳出發，去到赤徑一段係熱身嘅石屎路，之後一路上大浪坳 都屬於易行嘅山路。不過一離開大浪坳之後，大家就要做好心理準備，因為往後果六七小時都會係坡度極大嘅浮沙碎石路！上蚺蛇尖嘅路徑相當陡峭，有某啲部份更加要手足並用！雖然風景一絕，不過大家緊記走路不看景，看景不走路，到達山頂，遙望船灣淡水湖，東平洲，大鵬灣，南澳，南中國海，呢個景觀，千金不換！

如果你覺得上山已經好困難，咁落山你直情會絕望！由蚺蛇尖頂下降至米粉頂 一段，難度同狗牙嶺相若，不過呢段並非戲肉，由米粉頂出米粉咀地圖睇好似好短咁，但係由於斜度高，真係好考山友們嘅平衡！米粉咀景色都唔錯，不過事實係，好戲在後頭！

沿路返上去再向短咀出發，當中開始有其他分支小路，呢一部份好考大家嘅地圖閱讀技巧。如果大家用開行山app，記得一早下載離線地圖，因為呢部份應該係冇任何電話網絡覆蓋嘅。仲有，雖然Google大神乜都識，不過行呢啲路線就記得千祈唔好用google map，因為始終唔係專業行山地圖，又冇等高線，路線又未必準確。如果冇信心嘅，最好搵其他高人帶路。

搵啱路出短咀，呢一段小編覺得係四條路線當中景色最雄偉嘅！沿着刀鋒一樣嘅山脊走，望住短咀旁嘅危崖峭壁，仲有藍天碧海做背景，你會明白，點解日本人都要特登嚟香港行山！到達短咀，眼望大海，耳聽耳聽下面洶湧嘅海浪聲，套用蔡瀾嘅口頭禪，‘不羨仙’！

欣賞完畢好快啲返轉頭啦，因為仲有個長咀等緊你，雖然地圖睇路程比較遠，不過呢段由於上落幅度較小，而且經歷之前一尖兩咀嘅蹂躪，吧段感覺會相對易行。當然，如果體力開始透支或糧水不足，就要改道直出東灣。

長咀地勢較為平緩，好多人會淨係出長咀觀浪打卡，而且比較近海，所以景色同短咀各擅勝場！而且響長嘴開始見到四灣景色，如果你有廣角鏡頭，就可以影到一張完美嘅就可以影到一張完美嘅一尖田灣，小編當日就響度起碼留咗20分鐘瘋狂打卡！

咁當然都要回程嘅，沿着東灣山腰一直走就會到達東灣，呢個隱世沙灘水清沙幼得緊要，不過大家要記得，呢四灣風高浪急，好多人都喺度遇過意外，所以盡量唔好喺度戲水呀！

如果你覺得東灣已經好靚，大灣將會帶俾你雙倍嘅震撼！呢個接近1公里長嘅沙灘，由於比較偏遠，人數少之餘又較為乾淨，好有澳洲黃金海岸嘅感覺！

行到呢度，大家應該糧盡彈絕，影完相打完卡之後就可以過鹹田灣士多稍事休息，經過咁長嘅路段之後，嗰啖餐蛋麵嘅滿足感應該足以令你感動流涕！快快手手食完就繼續趕路，過西灣雖然要上斜，不過經歷過之前三條考牌路線嘅你，無論體能同技巧都有所提升，呢啲小小嘅斜路，濕濕碎啦！行到斜路頂望出去，你仲會見到史諾比同你打招呼（三個小海灣內的小島嘅形狀極似史諾比，唔信嘅自己去望下就知）

最後去到有名嘅大浪西灣，雖然風景仍然絕美，不過大家應該歸心似箭，向着吹風坳上西灣亭結束成個旅程。事實上，大部份人嚟到呢過到段應該日落西山，其實都可以放慢腳步慢慢欣賞西貢山巒嘅絕色。唔好以為去到西灣亭就完結呀，因為該處出名難截車，所以最好事先約定相熟的士司機或者事先上網搜尋村巴班次，預留足夠時間排隊，否則原本27公里嘅路段就會變成32公里，要多走5公里先至有巴士返出西貢架啦！

感謝大家支持，四大行山考牌路線已經介紹完畢！都係果句，行山其實冇考牌唔考牌，最重要都係以山會友，享受自然美。