• runforgoodhk

【四大行山考牌路線介紹】杯靈雙渡

*以下介紹路線,路徑崎嶇難行,導航亦不容易,只適宜有經驗及充足準備的山/跑友挑戰,荒野危險,切勿獨行。

故老相傳,香港有四條行山考牌路線,有能力完成四條路線代表行山經驗豐富及能力高強,呢四條路線距離長,上落大,路況差,易迷路,考驗耐力同對野外環境嘅判斷,屬於高級組路線,只限高手,如果響炎夏挑戰呢四條路線,對體能嘅要求更大!小編就趁呢排天氣比較相宜,走訪晒四條路線,同大家分享吓路線嘅點點滴滴。

路線一:杯靈雙渡

杯靈雙渡位於屯門,‘杯’指杯渡山,亦即青山,‘靈’則指靈渡山,即天水圍附近的圓頭山,顧名思義,杯靈雙渡需橫越兩個山,路線大約12公里。

筆者認為,呢條線係四條路徑當中最有歷史玩味嘅路線,如果你由青山出發,你將會經過青山禪寺,青山禪寺由杯渡禪師所創立,所以山友有時亦會將青山稱為杯渡山,青山禪院據稱 東晉時所創立,已經有1500年歷史,不過我相信有心挑戰杯靈雙渡嘅朋友們應該唔會有時間慢慢欣賞,因為短短12公里一般需時7-10小時完成。

由青山禪院力拔至青山山頂(583米),長長的石級路會令你懷疑人生,當到達山頂的休息涼亭,千祈記得要上多幾步去到發射塔房嘅山頂標高柱,因為景色同氣勢可以同西貢嘅南蛇尖 平分春色,而且既然叫得做杯靈雙渡,又點可以唔上埋山頂呢?

如果你上青山已經覺得好花氣力,建議你沿路落山,因為往後嘅路段只會更艱難,由青山至圓頭山一帶稱為青山腹地,呢一帶嘅路況風化嚴重,而且相當陡峭,某啲路段更加係軍方操炮區,絕對不適宜缺乏裝備及經驗嘅朋友亂闖。由青山下降至良景坳,大家完全可以感受山野版五彩天梯,浮沙碎石以及陡峭嘅程度,絕對考驗山友們嘅平衡以及核心肌肉群嘅強度!

去到良景坳,如果感覺良好,糧水充足,就可以繼續向乾山 出發。呢個路段開始遊人數量開始稀少,乾山一帶嘅路段比青山只有更差,大家而家上去之前要做好心理準備,之後嘅一線脊更加係成個路段嘅高潮所在,短短一米嘅路段,兩旁都是接近5米嘅直崖,坦白講,筆者建議大家可以響旁邊繞過一線脊,除咗安全理由外,如果個個行過都踩兩腳,我相信呢個小小山脊遲早會風化斷裂,所以大家不如遠觀一下,欣賞大自然嘅鬼斧神工,之後繼續上路。

上上落落,到最後大家就會見到圓頭山,其實圓頭山相當易認,山頂有幾棵好有禪意 嘅大樹,彷彿有高僧響樹下說法一樣。而圓頭山風景比青山亦不遑多讓,除咗可以回望由青山一路走過嘅路之外,仲可以遠眺流浮山 一帶嘅蠔排,深圳灣大橋,以及屯門,天水圍 一帶嘅景色。

唔好以為去到圓頭山就已經完結,由山頂下降至靈渡寺係成段斜度到最高嘅一段,雖然山頂有扶手繩協助落山,不過大家最好唔好完全倚賴,去到後段記得留意右轉落靈渡寺 嘅路口,作為香港佛教其中一個重要發源地,靈渡寺相傳都有1400年歷史,亦係一個完美嘅旅途終點。

呢條路線景色壯麗,雖然崎嶇難行,但係完成之後嘅滿足感不能言喻,不過,其實行山邊有考牌唔考牌?最緊要大家玩得安全,量力以為,以山會友,阿彌陀佛。

最後,無論去邊度行山,切記以下行山禮儀呀!


0 comments