【區區有步跑-海濱系列】馬鞍山海濱長廊

上次介紹完將軍澳海濱,唔知大家有冇去跑呢?嚟到區區有步跑-海濱系列嘅第二集,今日小編就去到馬鞍山海濱長廊,跑一條自己成日都跑嘅路線。

去海濱長廊跑步有好多好處,其中一個好處就係唔需要擔心補給,交通亦都非常方便。馬鞍山海濱長廊都係一樣,由馬鞍山馬鐵站行去海濱長廊只係短短5分鐘嘅路程,隔離仲有個大商場,所以交通同埋補給係十分方便。

小編今日就選擇咗係海典居作為起點向大水坑方向出發啦!路線非常簡單,只係一條直線咁沿住海濱跑,成條海濱長廊由海典居起點開始計,去到大水坑嘅盡頭啱啱好就3km。嚟到大水坑呢度,跑到攰攰哋嘅朋友可以係公廁洗個面,又或者喺汽水機買啲嘢飲。休息完就開始原路折返啦~跑到返去啱啱好6km呀。


(沿住海濱仲有公廁同埋汽水機,方便大家補給!)

小編平時好鐘意嚟呢度跑架,除咗貪佢夠方便之外,我仲貪佢夠條路夠簡單呀嘛!等我可以更加容易控制我跑步嘅步速,令我嘅練習簡直係事半功倍呀!除此之外,大家仲可以欣賞一下吐露港嘅風景。沿着海濱長廊,我哋可以仲會見到科學園,八仙嶺等地方。各位跑友有興趣就快啲叫埋朋友仔一齊試吓去跑啦!


(離遠仲可以見到八仙嶺添呀!另外附上strava cap 圖一幅)



0 comments