【區區有步跑-海濱系列】青衣海濱長廊

*係2月28日前跟住以下落嚟介紹嘅路線跑，將有機會免費獲得 #The12Peaks #12峰越野跑步比賽 嘅參賽名額一個，詳情請留意Run For Good Facebook 專頁！

話咁快我哋區區有步跑-海濱系列已經嚟到第三集啦！話說小編新年嘅時候食到依家脹到成個波咁，所以小編由今日開始決定減肥！嚟到葵青區，試一試青衣海濱長廊。

同之前介紹過嘅地方一樣，青衣海濱長廊嘅交通同埋補給都係好方便。由青衣鐵路站穿過青衣城行去海濱長廊只係大約5分鐘嘅路程，另外，青衣運動場就係正海濱長廊嘅隔離，而最近各區嘅運動場已經重開，各位跑友如果需要使用儲物櫃同更衣室就可以去到青衣運動場。

小編今日就由青衣碼頭作為起點，向青衣東北公園方向出發。各位跑友跑呢條路嘅時候記得留意小心周圍嘅行人，特別係老人家同埋小朋友，因為一路沿住海旁都有唔少遊樂設施，所以有好多老人家小朋友喺度散步同埋遊玩，呢一點大家要特別留意啦！

由青衣碼頭出發，沿住海旁一路跑，旁邊嘅就係藍巴勒海峽，經過青雅苑，長發邨之後好快就會去到青衣東北公園。喺呢度仲會見到汀九橋一帶嘅風景！之後，小編就喺青衣東北公園嘅盡頭折返，沿路跑返去青衣碼頭。跑到呢一度路程其實啱啱好4km，不過小編就覺得唔夠喉啦，決定向長輝路海濱花園方向繼續跑，經過香港海關青衣辦事處，去到和記電訊大廈先折返返去青衣碼頭，成條跑全長啱啱好6km。

（唔夠喉嘅朋友可以經長輝路海濱花園跑到和記電訊大廈，一來一回啱啱好多2km！）

最近天氣咁好，大家新年又一定食咗唔少好嘢，係時候出去跑步消一消脂啦！大家快d叫埋你嘅朋友仔一齊去試吓呢條路啦！

最後附上小編嘅strava cap 圖同埋小編愛犬靚相一幅，希望大家繼續多多支持Run For Good 啦！