【區區有步跑-海濱系列】紅磡尖沙咀海濱長廊

*係2月28日前跟住以下落嚟介紹嘅路線跑，將有機會免費獲得 #The12Peaks #12峰越野跑步比賽 嘅參賽名額一個，詳情請留意 Run For Good Facebook 專頁！

最後一期海濱長廊推介，點少得香港嘅地標- 維多利亞港！今次小編就嘗試返工嘅時候同大家跑下條海濱長廊，介紹路線之餘又可以 #通勤跑！（編按：通勤跑來自日本詞彙，意思即係跑步返工作恆常訓練）

小編今次由 #尖沙咀碼頭 出發（事實係小編家住美孚，由美孚先跑去尖沙咀再跑，話明通勤跑冇理由搭車嘅！），沿住海邊一路跑到 #星光大道，大家可能會問，如果我想搵行李寄存，附近有冇選擇？老老實實，附近最近嘅運動場就係九龍公園，如果大家唔介意走多一兩公里可以放行李響嗰度，不過小編自己跑通常會有個小跑袋跟身，替換衣物電腦銀包鎖匙電話通通放晒入袋就可以變身即刻跑，呢啲都係 #通勤跑手 嘅特別技巧，啲行李同電腦可以有咁細得咁細咁放落個小跑袋咩住周圍走！不過如果大家唔介意付費，K11 Musea 有付費行李櫃俾大家放袋，收費$30/2小時，大家都可以考慮吓，跑完順便行吓呢個世界級嘅商場，好多KOL都特登入去打卡㗎，大家亦可以選擇新開通嘅紅磡中環線碼頭，嗰度都有locker，仲要平小小，$18/3小時，放低行李跑幾個圈都夠哂！

(星光大道景點多，晨早流流無乜人要點打咭都得)

(K11 Musea + Victoria Dockside)

沿着星光大道一路跑，好快就會去到接駁紅磡同黃埔嘅行人天橋，少少上斜少少落斜就會去到黃埔海濱長廊，小編其實鍾意呢段多過星光大道，皆因星光大道好多時太多人，跑起來左閃右避又怕撞親人。沿着海濱長廊一路跑會經過黃埔碼頭，有時小編放工跑返屋企會選擇中環先跑去北角，再去北角搭船嚟紅磡碼頭再走海濱長廊沿海跑返美孚，咁就可以完全欣賞晒維港兩岸景色！

(小小上，小小落)

(紅磡中環線碼頭Locker，盛惠$30)

再繼續跑就會去到黃埔花園同大環山游泳池一帶嘅海皮，呢一段都頗多人釣魚，跑步嘅時候要留意釣友揮竿。再繼續沿着海邊一直行就會去到海逸豪園嘅盡頭，如果需要補給可以左轉上樓梯，大約20米左右就會有便利店，飲杯嘢抹下汗休息吓就可以返轉頭，如果天星碼頭出發去到盡頭返轉頭應該大概8KM左右，作為恒常訓練算係唔錯㗎啦！跑個來回就搭天星小輪過海返工，準備搏殺!

(渡海輪上，萬家燈火裏，多少個的你或我曾為這光景陶醉.....)