• runforgoodhk

【區區有步跑】香港越野定向徑第四集

介紹咗三集,大家係咪已經大約掌握到基本定向技巧呢?今次同大家介紹嘅鰂魚涌野外定向徑,比較之前幾條支路較多,而且比較多隱蔽嘅控制點。不過由於地勢較高,所以景色都幾靚㗎,有信心挑戰嘅朋友就唔好錯過啦!


鰂魚涌野外定向徑


呢條定向徑嘅交通尚算方便,大家可以搭港鐵去到鰂魚涌站或者太古站落車,經鰂魚涌市政大廈上柏架山道,去到金督馳馬徑入口就係定向徑嘅起點。大家要留意,呢條定向徑起點同終點嚮唔同嘅位置,等大家設定路線嘅時候可以更加靈活。呢條路線特別嘅地方係有幾個控制點嚮密林之間,考大家對位置嘅判斷。不過請放心,每個點都有小路到達,毋須‘爆林’。大家行嘅時候亦都可以順便欣賞下維港兩岸景色,玩完更加可以繼續沿金督馳馬徑行多一陣先完結旅程。之前講過一些基本定向技巧,今次同大家分享吓裝備注意事項!


(金督馳馬徑)

1. 定向專用指南針

定向專用指南針一般係透明底板,中間轉盤可以自由轉動,方便設定前進方向,高階版更加係直接套嚮大拇指上,方便運動員迅速運用。

2. 定向專用地圖

之前都提過定向專用地圖對地勢嘅描述較詳細,比例亦較大,需要運動員有較高嘅地圖閱讀技巧能力方能使用。

3. 服裝

服裝方面,一套快乾嘅跑步衫褲當然係首選,但係某啲比賽需要進入密林,所以運動員有時都會穿上手袖同埋長緊身運動褲進行比賽,當然一對高咬地能力嘅跑山鞋 就唔可以缺少,視乎唔同嘅路段,有啲運動員更加會着上釘鞋,方便進入較泥濘嘅路段。

4. 指卡

現代嘅定向比賽絕大多數都係使用電子計時打卡系統,需要配備對應嘅電子指卡。香港嘅定向比賽大多能夠租借,某些專業比賽則須自備指卡。

5. 哨子

哨子係所有定向比賽必備裝備。事實上,就算平時行山帶個哨子都係有備無患。依家好多跑山背囊嘅背囊其實已經內置哨子(話你知,其實一般心口位置扣子都可以當哨子使用)

6. 手錶

切記,定向比賽的手錶只能用作看時間之用,所有具備GPS功能嘅手錶是禁止使用的。咁野外定向嘛,靠科技又有咩好玩呢?

大家可以預先下載以下地圖,同朋友一齊挑戰下呢條定向徑啦!

https://www.afcd.gov.hk/.../Quarry_Bay_Orienteering_Trail...


0 comments