• runforgoodhk

【區區有步跑】香港越野定向徑第五集

來到最後一集,小編會帶大家去到香港嘅後花園-西貢。香港有兩個灣仔,位於港島區嘅灣仔相信大家一定去過。其實西貢都有一個灣仔,位於海下灣海岸郊野公園,呢度喺露營聖地,每逢假日,好多人會分別從水陸兩路來到呢度享受露營樂趣。不過好多人都唔知,其實呢度仲有一條隱世野外定向徑-灣仔野外定向徑。


要來到呢條定向徑,大家首先要去到西貢市中心專線小巴去到海下,再由海下行去灣仔營地。由市區去到起點起碼要一個半小時,所以大家可以帶埋露營裝備,咁就唔使山長水遠咁入去玩一陣又滾水淥腳咁趕住車出返嚟。而且灣仔營地 配套十足,風景怡人,響度露營真係好寫意架!

講返條定向徑,如果大家玩完之前嗰四集都游刃有餘,呢條定向徑就啱晒你啦,小編嘗試同朋友玩完之後都一致認為,呢個定向徑嘅設計最似一個真正定向比賽,有一半以上嘅控制點隱藏響密林之中,需要仔細觀察甚至爆林先至搵到。而且有好多地圖冇標示嘅隱藏小徑,大大增加左路線嘅趣味性同難度。而且路線附近仲有著名景點棺材角(留意:前往棺材角嘅路徑較為崎嶇難行,只適宜有經驗嘅朋友前往),可以眺望赤洲,黃竹角咀,塔門等等嘅靚景。鍾意大自然嘅你,疫情過後就快啲去挑戰下呢條野外定向徑啦!


(風景靚到一流!)

地圖下載:

https://www.afcd.gov.hk/.../Wan_Tsai_Orienteering...


0 comments

© 2021 Run For Good.