【區區有步跑】香港越野定向徑

有咩運動可以自己玩或者一班人玩?有咩有咩運動可以跑又得,行又得?有咩運動可以當作親子活動,親親親大自然,同時又可以當成競賽


答案係:定向運動


定向運動起源於瑞典,利用地圖,指南針同領航技巧,響有限時間入面搵到地圖入面最多嘅控制點Check Point。除咗考驗體能之外,更加需要運用唔同嘅策略,既鬥智又鬥力!呢項運動近年更加已普及化,好適合一家大細又或者同朋友一齊玩。其實漁護署響喺香港設立左五條 野外定向徑俾市民免費使用,小編會一連五集同大家介紹每一條路線,等大家可以體驗呢項運動。


香港仔野外定向徑

呢條路線非常方便,響香港仔漁光村 起步,沿香港仔水塘徑去到香港仔下水塘嘅水壩就係定向徑嘅起點。呢條路線大部份嘅控制點都係圍繞香港仔下水塘,景色優美,好適合一家大細一齊去挑戰下,而且上落差不大,距離亦適中,大約一至三小時就可以完成。

(香港仔水塘)

(控制點)

如果想試吓玩,大家可以根據以下步驟去挑戰下㗎!

1. 到漁護署網頁下載定向地圖,亦可按以下連結:

https://www.afcd.gov.hk/.../Aberdeen_Ori_Smalle_Trail_s.jpg

大家最好列印一份實體地圖,會比用手機睇容易好多,而且絕大部份定向比賽並不容許使用手機。

2. 初學者其實可以利用手機嘅指南針功能,雖然唔係正統定向技巧,不過如果係休閒體驗下,電話都已經足夠嘅,當然你亦可以選擇到野外用品店購買定向用指南針,價錢由$100-$600不等。

3. 到達起點後,利用指南針將地圖的方位校準,然後計劃最佳路線,如果同小朋友一齊玩,毋須去晒所有Check Point (控制點),等小朋友自己決定路線。如果係幾個朋友玩,為安全起見,最好以三人一組互相比拼,避免獨行。

4. 根據自己嘅路線,盡量到達最多嘅Check Point。到達後可以用手機影張相作為證明。

5. 限時內大家要返到終點,或者約定其中一個Check Point作為比賽嘅完結點,睇吓邊一個能夠去到最多嘅點就係贏㗎啦!

6. 當然大家記得帶夠糧水,呢條定向徑基本上都能夠收到電話,如果真係迷路,你亦可以沿途折返到起點。有啲Check Point係故意收埋喺樹叢後面,所以大家一路玩都要一路觀察周圍環境,稍一唔留神就好容易錯過㗎啦!

呢排天氣咁好,快啲約啲朋友一齊去玩啦!



0 comments