• runforgoodhk

【區區有步跑-海濱系列】將軍澳海濱長廊

*係2月28日前跟住以下落嚟介紹嘅路線跑,將有機會免費獲得 #The12Peaks #12峰越野跑步比賽 嘅參賽名額一個,詳情請留意Run For Good Facebook 專頁!


唔知大家有冇去試跑過Run For Good 之前介紹過一系列嘅跑步路線呢?最近天氣又開始回暖,大家冇藉口再繼續懶啦!快啲襯住依家天氣咁好換衫落街跑步啦!


今日小編就想同大家介紹一條新嘅路線啦!嗰度風景好靚架~你哋估到係邊度未呢?冇錯!就係將軍澳海傍啦!


(將軍澳運動場)

(大家小心留意呢啲路口位,唔好跑錯路呀!)

小編今日就揀咗喺將軍澳運動場向將軍澳海濱長廊方向出發。將軍澳運動場隔離就係單車館,單車館入面可以租單車㗎,有興趣嚟踩單車嘅朋友可以留意吓。講返條路線,由將軍澳運動場出發向海傍方向一直跑,好快就會見到往尚德既路牌,跟住路牌指示嘅方向繼續跑,過咗隧道之後就到咗將軍澳海傍啦,之後沿住單車徑一路向前跑,到路口轉左,好快就會見到條天橋,過埋條天橋就正式到達將軍澳海濱長廊啦。


(吹住海風跑步,真係幾正)

沿住海濱長廊一路跑,雖然將軍澳海傍一帶都有工程,但都唔影響海景㗎!一路跑一路吹住海風真係好舒服!海濱長廊嘅盡頭就係日出康城啦,之後大家可以跑返去天橋,喺天橋底嘅位置會有一條分叉路,係通向海濱長廊嘅另一邊。而呢一邊嘅海濱長廊因為係住宅區,所以沿住成條海濱都開咗好多cafe同埋餐廳。各位跑友跑完步之後可以去食返餐勁嘅!另外,海濱長廊沿途都設有公廁同埋汽水機,大家跑到攰攰地可以去廁所洗個面或者買支嘢飲,完全唔需要擔心補給嘅問題呀!


(呢一邊嘅海濱長廊係有勁多餐廳!)

小編再沿住呢一邊嘅海濱長廊一直跑,跑到海濱長廊嘅盡頭就折返,最後以將軍澳新開嘅Donki作為終點。成條路全長啱啱好6公里。(你可能會問點解小編嘅終點要set喺Donki?因為小編要買我最鍾意食嘅章魚燒囉!跑完步緊係要好好獎勵自己啦!你地話係咪先?)

呢條路有一個好大嘅優點,就係成條海濱長廊嘅路又闊又平坦,跑到有啲攰仲可以係海傍附近休息下,欣賞下風景添,真係非常適合新手架!另外,海濱長廊一帶好容易就可以搵到補給點,交通亦都非常方便,所以真係好適合大家嚟做日常鍛練。


最近天氣咁好,大家快啲叫埋朋友仔一齊去跑下呢條路線啦!


跟住落嚟小編會分享更多做運動嘅路線同埋點滴,大家有興趣嘅記得多啲留意啦!


(最後分享埋小編嘅strava cap圖同埋跑步相一張,希望大家多多支持啦!)



0 comments