• runforgoodhk

【區區有步跑】單車屯馬線之跑步遊4

嚟到最後一段嘅單車屯馬線啦!究竟太和至馬鞍山呢一段有咩驚喜?小編而家就帶你哋去睇睇!

第四段:太和火車站-林村河-元州仔公園-吐露港公路-科學園-馬鞍山海濱長廊

(錦和橋)


最後一段由太和火車站開始,雖然話係單車屯馬線,不過呢段建議大家A出口由錦和橋出發,沿林村河向吐露港方向跑,沿河風光比單車徑更靚,又唔驚迷路。林村河近年水質改善不少,隨處可見唔同品種嘅魚類,小編當日就見到 生魚,烏頭,鯽魚等等嘅常見物種。

(林村河)

(吐露港單車徑)

沿着河一路跑就會去到元洲仔公園,呢度開始就係大家都好熟悉嘅吐露港風景,相信大家都應該喺呢度踩過單車㗎啦。不過又有冇試過跑過呢一條咁出名嘅單車徑呢?其實幾年前呢度做咗個改善工程之後,路面闊咗好多,唔使再好似以前咁人車爭路,沿途仲有唔少樹陰,就算夏天都唔使由頭哂到落尾。

(孖橋)

去到孖橋,大家可以選擇向大圍方向跑返入城門河,最後跑返去源禾路體育館完結,又或者越過城門河,向馬鞍山方向,經馬鞍山海濱長廊去到 馬鞍山體育館完結。兩邊嘅距離其實差唔多,不過話明係屯馬線,我哋當然選擇以馬鞍山終結我哋嘅旅程。

(馬鞍山海濱長廊)

後記:呢條單車屯馬線景色相當靚,補給亦足夠,而且會途經好多好值得遊覽嘅地方,例如濕地公園,大生圍,塱原濕地,龍坑等等。不過各位單車朋友就要小心啲,因為某啲路段其實好窄,馬路亦多,而且好多地方都有石壆,一個唔留神佢就會好容易‘鄧’親個pat pat。反而跑步就冇呢個煩惱,而且全程都有行人路,唔需要冒險跑落單車徑,各位跑友們有時間記得去試吓啦!玩開超馬嘅朋友更加可以挑戰一口氣完成呢條超過60公里嘅路線,Run For Good就計劃緊響今年稍後時間以自發,自行補給,和不收任何費用嘅形式,在不違反抗疫措施情況下,號召有興趣嘅跑友們以半程同全程嘅型式一齊去挑戰呢條路線。如果你同埋朋友仔有興趣,可以一齊參加!



0 comments