【區區有步跑】單車屯馬線之跑步遊2

唔知有冇朋友仔跟住小編上次推介嘅單車屯馬線去跑下步呢？小編預備呢個系列嘅時候，真係覺得呢條路線其實都幾適合跑步，不過當然緊記要留喺行人路上面啦！事不宜遲，小編即刻介紹第2段 - 天水圍至新田段。

第二段：天水圍單車滙合中心-朗屏-元朗西鐵站-綿田河-大生圍濕地-青山公路潭尾段-文天祥公園-落馬洲公共交通轉車站（約15K）

(起點-天水圍單車滙合中心)

今次我哋響天水圍出發，起步點天水圍西鐵站有驚喜喎！原來E出口有一個自助加水站，各位跑步行山或者單車友可以輕輕鬆鬆帶個樽去到起點先裝水！

沿着E1出囗向前行幾步就到達天水圍單車滙合中心，入面有全日單車租借服務，仲可以選擇響沙田，大埔，或者大學站還車，如果選擇踩單車嘅朋友要留意啦！

沿滙合中心向東，沿朗天路方向一路跑，好快就到朗屏邨，再沿單車徑一路跑就會去到元朗西鐵站，不過由於呢頭嘅單車徑真係好四通八達，所以都幾容易蕩失路，有興趣跑嘅朋友記得睇住地圖跑就萬無一失啦。

(靚絶河景，生態亦多元化)

(新建成嘅單車路段)

前半段都係城市景，都算大塵冇乜特別，不過去到博愛醫院 開始就會見到濕地河景，事實上跑有門如果想跑下有名嘅南生圍，有興趣探索下南生圍嘅朋友可以選擇響博愛醫院旁小路入去，一直跑到尾仲可以搭埋有名嘅橫水渡 返元朗。不過其實呢段單車屯馬線去到壆圍南路 其實都會沿着錦田河 跑，風景一流之餘仲會睇到好多濕地生態，小編之前就親眼見到一群成隻腳咁長嘅鯰魚 游過，真係大開眼界！跑遠少少就會見到雞公嶺 嘅雄姿，啱晒大家打卡。

(文天祥公園)

沿住咁靚嘅河景一路跑大約三四公里之後就會返到青山公路潭尾段，又係一段大塵嘅路段，怕食塵嘅朋友可以帶返個口罩慢慢跑，再跑多3公里左右就會去到一個好特別嘅公園-文天祥公園。原來呢個公園係文天祥嘅後人籌款興建，去紀念呢位抵抗外族嘅英雄，對歷史有研究嘅朋友記得上去同個雕像打個卡呀！

影完相打完卡再繼續跑多一兩公里左右就會去到呢一段嘅終點-落馬洲公共轉車站。大家可以響洗手間玩件衫洗個面，跟住搭車返元朗或者上水粉嶺一帶。當然嫌短嘅朋友亦可以選擇繼續跑去上水或者粉嶺，路線小編會響下一集同大家分享！

溫馨提示：跑友們記得留返喺行人路上面，盡量唔好落單車徑，尤其假日，人車爭路好危險㗎。