【區區有步跑】單車屯馬線之跑步遊

秋天嚟啦！近排跑步行山特別爽，大家係咪諗緊呢個週末去邊好呢？其實香港單車徑四通八達，近期啱啱開通嘅單車屯馬線（編按：由屯門到馬鞍山，全程大約60至70公里左右）相當受單車朋友歡迎，究竟呢條單車徑可唔可以用雙腳跑完？小編將會一連4集將路線分成4段同大家分享，每段大約18-25公里，起點同終點都係交通比較便利嘅地方，大家如果週末打算跑下步踩下單車嘅就可以試下呢幾條路線啦!

第一段：望后石-屯門西鐵站-兆康-洪水橋-洪福邨-濕地公園-天水圍西鐵站（約18-20k）

(望后石起點)

單車屯馬線嘅起步點一直眾說紛紜，有人由屯門馬頭開始，亦有人由屯門西鐵站起步，當然邊度起步其實冇乜所謂，不過大家如果想原汁原味成條路線跑哂，就可以參照以下樓盤木工程拓展署發出嘅屯門至上水單車徑規劃圖，如果真係要計起點，大家其實可以由屯門碼頭 出發，又或者由最西望后石 起步。大家可以由屯門西鐵站坐免費接駁巴士K52於望后石落車，沿馬路回走幾百米就可以見到單車徑起點。一起步大家就可以見到全香港最長嘅海底隧道- 屯門赤鱲角隧道公路屯赤隧道。不過其實淨係見到條橋，條公路係行人止步㗎。由望后石去到屯門河一段，可以望到屯門海濱，蝴蝶灣同青山嘅靚景，不過好多大車，沙塵滾滾，怕沙塵嘅跑友就建議由屯門碼頭開始（不過香港街跑其實點都要食塵⋯⋯）

(屯赤隧道公路)

去到屯門河，景色就截然不同。你會見到屯門由舊到新嘅發展，包括工廠區，西鐵站上蓋發展，以及較舊嘅兆康苑，大興花園等等嘅住宅項目。沿住條路行一路跑其實都幾心曠神怡，空氣亦都相對清新啲。

(屯門紅橋)

(跑完屯門河之後轉跟輕鐵，跟住就會見到天水圍河景)

跟住條河跑到尾，就開始要跟住條輕鐵走，景色就由密密麻麻嘅高樓大廈變成較開揚嘅村屋群。一路去到洪水橋可以補給，便利店買支水又得，坐低食個飯亦得。起步再繼續跑多唔夠1公里就會去到洪天路，過埋馬路記得轉左進入天水圍範圍。

入咗天水圍其實好快就會去到天影路，如果大家有跑開天水圍10公里比賽，你會見返個5公里折返點，再繼續沿着單車徑一路跑，大家又會回歸河景，跑多幾公里就會見到濕地公園。如果你不求里數只求享受嘅，非常建議大家入去參觀下，入面有洗手間俾大家換件衫，亦有食肆可以食個飯順便認識下香港嘅濕地資源。不過疫情期間暫時關閉中，希望疫情快啲過去啦！

當然你唔打算參觀嘅亦都可以繼續沿單車徑跑，去到天華路過對面馬路就向着天水圍體育館方向前進，跟住可以入體育館度沖個涼換件衫再搭輕鐵或巴士離開。

溫馨提示：跑友們記得留返喺行人路上面，唔好跑落單車徑，尤其假日，人車爭路好危險㗎。